Қирғизистоннинг собиқ президенти Алмазбек Атамбаев зудлик билан касалхонага ётқизилиши керак. Бу ҳақда унинг адвокати Замир Жўшев маълум қилди, деб ёзади Tengrinews.
Адвокатнинг сўзларига кўра, мижозининг аҳволи инфарктолди ҳолатида, шунингдек, эски касалликлари ҳам қўзғаган. Хусусан, бел соҳасида оғриқ кучайган. Бироқ суд томонидан бир ой олдин тайинланган суд-тиббий экспертиза ҳали якунланмаган.
Адвокат таъкидлашича, судга 148 бетлик касаллик тарихининг нусхаси берилгач, экспертиза тайинланган.
«Алмазбек Атамбаев комплекс муолажага муҳтож. У колония шароитида даволана олмайди. Биз уни касалхонага ётқизиш учун жазони уй қамоғига ўзгартириш тўғрисида бир неча бор мурожаат юбордик. Аммо улар рад этилди», — деди Замир Жўшев.
Эслатиб ўтамиз, Алмазбек Атамбаевга қарши бир нечта жиноий ишлар қўзғатилган, жумладан, у ҳуқуқ-тартибот идоралари ходимларига нисбатан зўравонлик, оммавий тартибсизликларни ташкил қилиш, қотилликни ташкиллаштириш, одамларни гаровга олишни ташкил қилиш, коррупция ҳамда Қўй-Тош қишлоғи ва Иссиқкўл вилоятидаги ерларни ноқонуний равишда ўзлаштирганликда айбланган. Шунингдек, Алмазбек Атамбаев қотилликда ҳам гумон қилинган.
Аввалига Атамбаев Бишкекдаги 1-сонли тергов изоляторига жойлаштирилган, январь ойида эса Қирғизистон собиқ президенти тергов изоляторидан колонияга ўтказилган.
Изоҳ (0)