Pokiston Afg‘onistondan o‘z qo‘shinlarini olib ketayotgan va zarurat tug‘ilganida ushbu mamlakatda zudlik bilan terrorizmga qarshi operatsiyalarni amalga oshirmoqchi bo‘lgan AQShga o‘z harbiy bazalarini taqdim etishdan bosh tortdi. Bu haqda Anadolu agentligi xabar berdi.
“Baza izlash ularning istagi bo‘lishi mumkin. Lekin ularga bizning bazalarimizni berish haqida gap ham bo‘lishi mumkin emas, biz o‘z manfaatlarimiz haqida o‘ylashimiz kerak”, — deb ta’kidladi Pokiston tashqi ishlar vaziri Shoh Mahmud Qureyshi.
Qayd etilishicha, Amerika prezidentining milliy xavfsizlik bo‘yicha maslahatchisi Jeyk Sallivan berilgan Vashingtonning Pokistonda uchuvchisiz samolyot bazasini tashkil etish niyati haqidagi jurnalistlar tomonidan savolga Qo‘shma Shtatlarning Pokiston bilan harbiy, razvedka va diplomatik kanallar orqali Afg‘onistonning hech qachon AQShga qarshi terroristik hujumlar tayyorlanadigan maydonga aylanmasligi masalasini muhokama qilganini aytib javob berdi.
AQSh 2021-yil may oyidan Afg‘onistondan o‘z qo‘shinlarini olib chiqa boshladi. Bu jarayonning 2021-yilning 11-sentabrgacha yakunlanishi kutilmoqda.
“Biz Afg‘onistondan qo‘shinlarning olib chiqilishi bilan bir qatorda, mamlakatda tinchlik o‘rnatilishini istaymiz. Dunyo Pokistonni muammoning bir qismi deb hisoblamaydi”, — dedi Qureyshi.
Avvalroq AQSh Afg‘onistondan o‘z qo‘shinlarining uchdan bir qismini olib ketgani, qo‘shinlarni olib chiqish jarayonida AQShga qaytarilmaydigan yoki Afg‘oniston milliy mudofaa va xavfsizlik kuchlariga topshirilmaydigan harbiy texnikalarning yo‘q qilinishi haqida xabar berilgandi.
Izoh (0)