Мўғулистонда президент сайлови бўлиб ўтмоқда

Мўғулистонда 9 июнь, чоршанба куни президент сайловида овоз бериш бошланди, деб ёзади «ТАСС».

Бу йилги президентлик сайлови мамлакат конституциясига киритилган ўзгартиришлардан буён биринчи марта ўтказилмоқда. Ўзгартиришларга кўра, давлат раҳбари ушбу лавозимни олти йил давомида қайта сайланиш ҳуқуқисиз эгаллаши мумкин.

Овоз бериш маҳаллий вақт билан 07:00 да (Тошкент вақти билан 04:00) бошланди. Сайловда 3,3 миллионга яқин аҳолиси бўлган мазкур мамлакатнинг 2,15 миллиондан ортиқ фуқароси иштирок этиши мумкин. Сайлов участкалари маҳаллий вақт билан соат 22:00 гача (Тошкент вақти билан 19:00) ишлайди.

Бу йилги сайловда давлат раҳбарлиги учун уч нафар номзод кураш олиб бормоқда. Улар ҳокимиятдаги Мўғил халқ партияси раиси, мамлакатнинг собиқ бош вазири Ухнаагийн Хурельсух, мухолифатчи Демократик партиянинг собиқ раиси Содномзундуйн Эрдене ҳамда ўнг қанот сайловчилари коалициясидан номзоди қўйилган Буюк давлат хурали (парламент)нинг собиқ депутати Дангаасуренгийн Энхбат.

Энг кўп овоз тўплаган ёки 50 фоиз + 1 дан ортиқ овоз олган номзод сайловда ғолиб бўлади. Агар номзодларнинг ҳеч бири ушбу натижага эриша олмаса, унда энг юқори овоз тўплаган икки номзод билан сайловнинг иккинчи босқичи ташкил этилади.