Ҳиндистонда коронавирусдан тузалган болаларда ўлимга олиб келадиган яллиғланиш синдроми тарқалди, деб ёзади Daily Mail нашри.
Хабарга кўра, мамлакат бўйлаб COVID-19’дан тузалган болаларда мультисистемали яллиғланиш синдроми (MIS-C)га чалиниш бўйича 2000 дан ортиқ ҳолат қайд этилган. Айни пайтда мазкур синдромга учраган болаларнинг 70 фоизга яқини интенсив терапияга муҳтож.
Қайд этилишича, MIS-C асосан, 5 ёшдан 15 ёшгача бўлган болаларга улар коронавирус билан касалланганидан икки-олти ҳафта ўтгач таъсир қилади. Касаллик биринчи навбатда юқори иситма шаклида ривожланиб, органларнинг яллиғланишига олиб келади. Бу камдан кам учрайди ва симптомларсиз кечган инфекциядан сўнг ривожланиши мумкин.
«Синдром юрак, нафас олиш ёки буйрак етишмовчилигига олиб келиши мумкин. Соғайиши учун узоқ вақт талаб қилинадиган болаларда ҳаёт даражаси синдромнинг органларга қанчалик ёмон таъсир қилганига боғлиқ. Касалликни ҳали даволаш осон бўлган дастлабки босқичдаёқ қўлга олиш жуда муҳимдир», — деди Деҳлидаги «Хардинж леди» тиббиёт коллежи педиатрия бўлими директори доктор Хариш Пемде. Унинг таъкидлашича, MIS-C ўлимга олиб келиши мумкин, чунки у кўплаб орган тизимларига таъсир қилади.
Тадқиқотлар шуни кўрсатдики, COVID-19 билан боғлиқ бўлган MIS-C ноёб яллиғланиш касаллигини танасида ривожлантирадиган барча болаларнинг ярмида неврологик белгилар мавжуд. Энг тез-тез учрайдиган аломат бош оғриғи бўлган, аммо болаларда галлюцинация ёки тутқаноқ каби янада жиддий иккиламчи таъсирлар пайдо бўлиши мумкин.
MIS-C дастлаб қон томирлари деворларининг яллиғланишини келтириб чиқарадиган ва асосан 5 ёшгача бўлган болаларга таъсир қиладиган Кавасаки касаллиги билан боғлиқ дея тахмин қилинган. MIS-C бўйича илк ҳолатлар Буюк Британия, Италия ва Испанияда 2020 йилнинг апрелида қайд этилган. Мутахассисларнинг таъкидлашича, MIS-C ташхиси қийин бўлган, чунки унинг кўплаб белгилари, жумладан, тошмалар, иситма ва ошқозон-ичак бузилиши бошқа болалар касалликларига ўхшашдир.
Мультисистемали яллиғланиш синдромининг бошқа аломатларига — тошма, йиринг чиқмасдан кўз шиллиқ пардасининг яллиғланиши ёки яллиғланишининг бошқа кўринишлари, қон босимининг тушиб кетиши ёки шок, коагулопатия белгилари киради. Даволашда иммуноглобулин терапияси ва кортикостероидлар қўлланилади. Синдром камдан кам учраса-да, бу бола учун вируснинг ўзига қараганда анча хавфли бўлиши мумкин.
Эслатиб ўтамиз, Ҳиндистонда COVID-пандемия фонида одамларнинг хавфли замбуруғларга чалиниш ҳолатлари кўпайди. Мамлакатда коронавирус тарқалишининг иккиламчи таъсири сифатида пайдо бўлган қора замбуруғ эпидемияси фонида яна бир замбуруғ касаллиги аниқланди, у мамлакатда оқ замбуруғ деб аталади.
Май охирида Ҳиндистон шифокорлари коронавирусга чалинган беморда замбуруғ инфекциясининг учинчи тури — сариқ замбуруғни аниқлади. Мамлакатда сариқ замбуруғ билан касалланган биринчи бемор вафот этди.
Изоҳ (0)