«Толибон» Тожикистон ва Қирғизистонни ўз муаммоларини оқилона ва музокаралар йўли билан ҳал қилишга чақирди

«Толибон» Тожикистон ва Қирғизистонни «ўз муаммоларини мулоқот орқали ҳал қилишга ва ҳар икки давлатга фойда келтирадиган мантиқий ечим излашга» чақирди.

«Толибон»нинг матбуот котиби Забехулла Мужоҳид томонидан 5 июнь куни Twitter’да тарқатилган хабарда, жумладан, шундай дейилган: «‘Толибон’ икки исломий ва қардош мамлакатларни ўз муаммоларини мулоқот орқали ҳал этиш учун ҳаракат қилишга чақиради».

«Толибон»нинг Марказий Осиёдаги икки мамлакатни ўзаро келишмовчиликларни музокаралар йўли билан ҳал қилишга чақириши, гуруҳ АҚШ билан тинчлик битими имзолаганига ва Афғонистон ҳукумати билан келишув бўйича музокаралар олиб боришга рози бўлганига қарамай, Афғонистонда фаоллашган пайтига тўғри келмоқда.

Хусусан, Афғонистон ҳукуматининг масъул бўлими хабарига кўра АҚШ қўшинлари Афғонистондан олиб чиқилиши ҳақида эълон қилингандан кейин «Толибон» «қудратини кўрсатиб қўйиш учун ўз ҳаракатларини кучайтирмоқда».

Забехулла Мужоҳид ўз хабарида яна шундай ёзади: «Биз урушнинг зарари борасида жуда кўп амалий тажрибага эгамиз, бошланишида у осон кўриниши мумкин, аммо урушнинг бориши, унинг оқибатлари ва йўқотишлар анча катта бўлади».

Эслатиб ўтамиз, апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетганди. Қирғиз-тожик чегарасидаги низоларда 50 дан ортиқ одам ҳалок бўлган, 300 дан ортиқ уйлар ва инфратузилма объектлари вайрон қилинган, айрим бинолар ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олган, аммо эртаси куни яна отишма бошланган. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.

4 июнь куни Қирғизистон Тожикистон чегарасидаги вазиятнинг яна кескинлашганини хабар қилинди. Тожикистон вакиллари тунда Ўш вилояти Чон-Олай тумани ҳудудидаги тавсифланмаган жойда контейнер ўрнатишни бошлаган ҳамда Қирғизистон ҳудудига минг метргача кириб келган. Шунингдек, Қирғизистон ҳарбий вертолёти мазкур ҳудудга кетаётган пайт Тожикистон чегараси яқинига фавқулодда қўниб, ёниб кетгани ҳақида хабар берилди.

5 июнь куни Тожикистон ва Қирғизистон давлат хавфсизлик қўмиталари раҳбарлари чегарадан қўшинларни олиб кетиш ҳақида келишиб олди.