Ёшлар ишлари агентлиги IT Park ва Инновацион ривожланиш вазирлиги билан ҳамкорликда «Ўзбекистон учун 100 ғоя» танловини ишга туширди.
Танловда миллати, тили, дини ва ижтимоий келиб чиқишидан қатъи назар 14 ёшдан 30 ёшгача бўлган барча хоҳловчилар иштирок этиши мумкин.
Унда иштирок этиш учун қуйидаги йўналишлардан бири бўйича ғоя таклиф қилиш лозим:
- илм-фан, таълим ва соғлиқни сақлаш;
- маданият ва санъат;
- медиа;
- давлат хизматларини ривожлантириш;
- қурилиш, архитектура ва транспорт;
- тадбиркорлик ва бандлик;
- қишлоқ хўжалиги, ирригация ва агро технологиялар;
- ахборот технологиялари ва инновациялар;
- экология, қайта тикланувчи энергия манбалари ва кимё технологиялари.
Spot’нинг ёзишича, фақат битта йўналиш бўйича иштирок этиш ва ғоя тақдим этиш мумкин. Саралаб олинган энг яхши 100 та ғоя муаллифлари «Ўзбекистон ёшлари» иккинчи форумида ўз ғоясини Ўзбекистон Президентига тақдим этиш ва ҳукумат кўмагида уни амалга ошириш имкониятини қўлга киритади.
Ғолиблар ғояларини амалга оширишда қонунда белгиланган тартибда Ёшлар ишлари агентлиги томонидан молиялаштирилиши мумкин.
Танловда иштирок этиш мутлақо бепул. У учта босқичдан: саралаш босқичи, ҳудудий ва республика босқичларидан иборат.
Аризани якка тартибда ёки жамоа сифатида топшириш мумкин. Бунда жамоада иштирокчилар сони 5 нафардан ошмаслиги керак.
Эслатиб ўтамиз, Шавкат Мирзиёев 2020 йилнинг январь ойида ўтказган йиғилишда иқтидорли ёшларни кашф қилиш, уларнинг ташаббус ва интилишларини ҳар томонлама қўллаб-қувватлаш мақсадида ҳар бир вилоятда «Ўзбекистон учун 100 ғоя» лойиҳасини амалга ошириш зарурлигини билдирганди. «Ҳар бир вилоятдан 100 тадан ғоя келиб тушса, Ўзбекистон бўйича жами 1 минг 400 та ғоя бўлади. 100 тадан ҳеч бўлмаганда 10 таси иқтисодий жиҳатдан барқарор бўлиб, албатта, мамлакат иқтисодиётига татбиқ этилади», — деган эди давлат раҳбари.
Изоҳ (0)