Ўзбекистон ва АҚШ ҳукумати ҳамкорликда Жиззах вилоятининг Қўйтош ва Қорасой ҳудудларида иккита вақтинчалик сейсмик станция ўрнатишни режалаштирмоқда. Бу ҳақда АҚШнинг Тошкентдаги элчихонаси матбуот хизмати «Gazeta.uz»га маълум қилди.
Хабарда айтилишича, 2 июнь куни элчихона ижарага олинган 14 минг долларлик ускуналарни ФВВ ҳузуридаги Сейсмопрогностик мониторинг республика маркази (СМРМ)га етказиб берди. СМРМ станцияларни Калифорния штатидаги Сан-Диего университети (UCSD) билан биргаликда ўрнатади.
2021 йил охирига қадар Қорасойда доимий станция ўрнатилиши режалаштирилган. АҚШ Давлат департаменти бунинг учун зарур ускуналар сотиб олади ва монтаж ишларини молиялаштиради.
Қорасойдаги доимий станция 152 та станциядан иборат Глобал сейсмик тармоқ (GSN)нинг бир қисмига айланади. GSN Калифорния штатидаги Сан-Диего университети ва Сейсмология қўшма тадқиқот институти томонидан биргаликда бошқарилади.
Маълумот учун, биринчи сейсмик станция 1901 йилда Тошкентда ишга туширилган ва Ўзбекистонда мунтазам инструментал сейсмологик кузатишлар бошланган. Тошкент зилзиласи (1966 йил) Ўзбекистонда сейсмологиянинг ривожланишида муҳим туртки бўлди. Ўзбекистонда зилзила ҳақидаги билимлар доираси кенгайди, сейсмик станциялар сони кўпайди.
ФВВ ҳузуридаги Сейсмопрогностик мониторинг республика маркази Президентнинг 2017 йил 1 июндаги фармонига мувофиқ тузилган. Марказнинг асосий вазифаси Ўзбекистон ҳудудининг сейсмиклигини кузатиш ва унинг ҳудудида ҳамда Марказий Осиё давлатларининг чегара ҳудудларида сейсмик ҳаракатларнинг ҳолатини таҳлил қилишдир.
СМРМда 50 та станция фаолият кўрсатмоқда, шундан 40 таси сейсмик станциялар ва 10 таси прогнозтик станциялар бўлиб, улар бир вақтнинг ўзида сейсмик жараёнларни мониторинг қилиш ишларини амалга оширади.
Изоҳ (0)