Жиззах шаҳрида йўл ҳаракати қоидаларини бузган ҳайдовчини ЙПХ ходими ҳақорат қилгани ҳақида хабар берилганди. Жиззах вилояти ИИБ томонидан ушбу ходимга нисбатан хизмат текшируви ўтказилди.
Қайд этилишича, 2021 йилнинг 12 апрель куни Жиззах вилояти ИИБ ЙҲХБ ЙПХ ходимлари З.П., З Ғ. ва Ш.М. Жиззах шаҳар Ислом Каримов шоҳкўчасида тунги хизматни олиб бораётган вақтида ЙПХ инспектори Ш.Муродов томонидан «ВАЗ-2108» машинаси ҳайдовчиси йўл ҳаракати қоидаларининг 99-бандида белгиланган талабларга амал қилмасдан ҳаракатланганлиги боис тўхтатилган.
ЙПХ ходими ҳайдовчидан меъёрий ҳужжатларни тақдим қилишини сўраганда ҳайдовчи ҳужжатларни тақдим эта олмаган. Ҳайдовчи А.Ж.га нисбатан белгиланган тартибда маъмурий баённома тузилиб, «ВАЗ-2108» вақтинча сақлаш учун жарима майдончасига махсус эвакуатор ёрдамида олиб кетилаётганда ҳайдовчи ЙПХ ходимига эътироз билдириб, қаршилик кўрсатган. ЙПХ инспектори Ш.Муродов ҳайдовчи билан мулоқот жараёнида носамимий муносабатда бўлган.
Хизмат текшируви хулосасига кўра, хизмат фаолияти давомида Вазирлар Маҳкамасининг 2018 йил 1 декабрдаги 975-сонли қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда ички ишлар вазирининг айрим меъёрий буйруқлари талабларини бузганлиги учун Жиззах вилояти ИИБ ЙҲХБ ЙПХ ходими Ш.Муродов эгаллаб турган лавозимидан озод этилди.
Бундан аввал Самарқандда ҳайдовчига хизмат гувоҳномасини тақдим этишни истамаган ЙПХ ходимига хизмат текшируви тайинлангани, Қорақалпоғистонда ҳайдовчига қўл кўтарган ЙПХ ходимига нисбатан хизмат текшируви ўтказилаётгани ҳамда Тошкентда қуввати тугаганини айтиб, ишламаётган бодикамера билан текширув ўтказган ЙПХ ходимига чора кўрилгани ҳақида хабар қилинганди.
Изоҳ (0)