Belarus mamlakatdagi AQSh elchixonasining diplomatik va ma’muriy-texnik xodimlarini qisqartiradi hamda viza berish tartibini kuchaytiradi. Belarus Tashqi ishlar vazirligi Ryanair samolyotining favqulodda Minskka qo‘nishi hamda Belarus muxolifati jurnalisti Roman Protasevichning hibsga olinishidan so‘ng AQSh tomonidan kiritilgan sanksiyalarga javoban shunday qarorga keldi, deb yozadi Meduza.
Bundan tashqari, Tashqi ishlar vazirligi amerikalik mutaxassislarning mamlakatda ishlashini vaqtincha cheklashga, shuningdek, AQSh Xalqaro taraqqiyot agentligi(USAID)ning Belarusda faoliyat olib borishi to‘g‘risidagi qarorini bekor qiladi, deya xabar berdi vazirlik veb-sayti.
“Ushbu chora-tadbirlar ma’lum bir nuqtaga qaratilgan, ular AQShga Belarus bilan munosabatlarda bosim va majburlash befoyda ekani to‘g‘risida ochiq signal yuborish uchun mo‘ljallangan”, — dedi tashqi ishlar vazirligi vakili Anatoliy Glaz.
Uning so‘zlariga ko‘ra, Minsk voqealarning bunday tus olishini kutgan, endi u Amerika cheklovlari Belarus aholisi va tashkilotlariga ta’sir qilmasligi uchun barcha imkoniyatlarni ishga solmoqda.
AQSh Davlat departamenti ma’lum qilishicha, Belarusning Amerika diplomatik vakolatxonasi xodimlarini qisqartirish to‘g‘risidagi qarori 13-iyundan kuchga kiradi.
May oyi oxirida AQSh Belarus bilan havo aloqalari to‘g‘risidagi shartnomani to‘xtatib, Belarus davlat korxonalariga qarshi sanksiyalarni yangilash to‘g‘risida ma’lum qilgandi. Bunga 23-may kuni Afinadan Vilnyusga yo‘l olgan Ryanair samolyotining bortida bomba borligi haqidagi xabar bilan Minskka majburiy qo‘ndirilishi sabab bo‘lgan. Tekshiruvlardan keyin samolyot bortidan hech qanday xavfli narsa topilmagan.
Ushbu reysda Belarusda terrorchi deb e’lon qilingan Nexta Telegram-kanalining sobiq bosh muharriri Roman Protasevich va uning qallig‘i rossiyalik Sofya Sapega bo‘lgan. Ular reysdan tushirilib, ikki oy muddatga hibsga olingan.
Ma’lumot uchun, AQSh prezidenti Jo Bayden o‘z ma’muriyatiga Minskda Ryanair samolyotining favqulodda qo‘nishi va Nexta Telegram-kanali asoschilaridan biri hibsga olinishida ishtirok etgan odamlarni javobgarlikka tortish choralarini ishlab chiqishni buyurdi.
O‘z navbatida, Yevropa Kengashi Ryanair samolyotining Belarusga majburan qo‘nishi hamda muxolif jurnalistining hibsga olinishini qoralamoqda.
Yuzaga kelayotgan keng ko‘lamli noroziliklarga javoban Belarus prezidenti Aleksandr Lukashenko Ryanair samolyotining favqulodda Minskka qo‘nishi hamda Roman Protasevich hibsga olinishi bilan bog‘liq hodisada qonun doirasida harakat qilganini ta’kidladi.
Fuqaro aviatsiyasi xalqaro tashkiloti Ryanair samolyotining Minskka majburiy qo‘nishi yuzasidan tekshiruv o‘tkazishini ma’lum qildi. Tashkilotning oraliq hisoboti 25-iyunda taqdim etilishi kutilmoqda.
Izoh (0)