Россия ҳукумати ҳар қандай чет эл фуқаролари ва фуқаролиги бўлмаган шахсларга нисбатан виза ва молиявий санкциялар жорий этишга рухсат берувчи қонун лойиҳасини Давлат Думасига кўриб чиқиш учун тақдим этди. Бу ҳақда Meduza хабар берди.
Бундай ўзгаришларни «Дима Яковлев қонуни»га киритиш таклиф қилинмоқда, айни пайтда ушбу қонун фақат АҚШ фуқароларига қарши санкциялар жорий этишга имкон беради. Қонун лойиҳаси муаллифлари ўз изоҳларида «Россия фуқароларининг ҳуқуқлари АҚШ фуқароларидан бошқалар томонидан ҳам бузилиши мумкинлигини» таъкидлади.
Санкциялар қаторига Россия Федерациясига киришни тақиқлаш, мол-мулкни мусодара қилиш ва чекловлар қўйилган шахсларнинг мол-мулки ва инвестициялари билан ҳар қандай операцияларни тақиқлаш киради.
Қонун лойиҳаси муаллифлари таъкидлашича, таклиф қилинаётган ўзгартиришлар чет эл фуқароларига россиялик етимларни асраб олишни тақиқламайди. Ушбу тақиқ «фақат АҚШ фуқароларига нисбатан қўлланишда давом этади, бу АҚШнинг агрессив санкция сиёсати билан боғлиқ», дейилган изоҳда.
Маълумот учун «Дима Яковлев қонуни» 2012 йил декабрда қабул қилинган. Унга кўра, америкаликларга россиялик етимларни асраб олиш тақиқланади. Россияик Дима Яковлев АҚШ фуқаролари томонидан асраб олинган ва 2008 йилда ота-онасининг бепарволиги туфайли вафот этган, шу сабабли қонунга унинг номи берилган. Шунингдек, қонун АҚШ фуқаролари учун Россия ҳудудида бир қатор чекловларни назарда тутади.
«Дима Яковлев қонуни»га 2020 йилда киритилган ўзгартишлар Россия ҳукуматига деярли ҳар қандай Россия фуқаросини «хорижий агент» сифатида тан олишга имкон беради.
Изоҳ (0)