Бутун дунёда коронавирусга чалинган одамлар сони 171 711 450 нафарга етди. Вирус 3 693 164 кишининг ҳаётига зомин бўлди. Жонс Ҳопкинс университети маълумотлари шундан далолат бермоқда. Касалланганлар сонининг кўплиги бўйича АҚШ (33,3 миллион), Ҳиндистон (28,54 миллион), Бразилия (16,7 миллион), Франция (5,7 миллион) ва Туркия (5,2 миллион) етакчилик қилмоқда.
Сурия президенти Башар Асад коронавирусга қарши эмланди.
Мамлакатнинг Москвадаги элчиси Риёд Хаддад маълум қилишича, президент Россиянинг «Спутник V» вакцинаси билан эмланган.
Дипломат, шунингдек, «Спутник V»нинг биринчи партияси Сурияга етказиб берилганини маълум қилди.
Унинг сўзларига кўра биринчи партия аллақачон етказилган. Ундан мамлакат шифокорлари ва юқори лавозимли амалдорларини эмлашда фойдаланилган. Ушбу босқич ниҳоясига етиб, эндиликда оддий аҳоли эмланмоқда.
Дипломат Сурияга етказиб берилган вакцинанинг аниқ миқдорини айта олмаслигини таъкидлади.
Мавзуга доир: Сурия «Спутник V» вакцинасини рўйхатдан ўтказди ва мамлакатда ундан фойдаланишга рухсат берилди
Беш мамлакат олимларнинг бирлашган гуруҳи D витамини COVID-19’нинг олдини олишда фойдасиз эканини исботлади.
Мутахассислар D витамини даражаси, коронавирусга сезувчанлик ва COVID-19 симптомларининг оғирлиги ўртасидаги сабаб-оқибат боғлиқлигини баҳолаш учун Менделеев рандомизациясини ўтказди.
D витаминининг COVID-19’га таъсири ҳақида кўпроқ билиш учун тадқиқотчилар генетикага мурожаат қилди.
Канада, Япония, Исроил, Италия ва Буюк Британия олимлари Менделеев рандомизацияси ёрдамида 11 мамлакатдан COVID-19 билан касалланган 4 мингдан зиёд одам ва касалланмаган 1,3 миллион одам ДНКсини таҳлил қилди.
Улар D витаминининг юқори даражаларига бўлган генетик мойиллик касалликнинг ривожланиши ва унинг натижаси билан боғлиқ ёки йўқлигига қизиқди.
«Ушбу тадқиқотда биз 25ОHD даражаси ва коронавирусга сезувчанлик, COVID-19 симптомларининг оғирлиги, унинг оқибатида касалхонага ётқизиш ҳолатлари ўртасидаги боғлиқликни қўллаб-қувватловчи далил топмадик. Шунинг учун D витамини COVID-19 оқибатларининг ёмонлашувига қарши ҳимоя сифатида генетик далиллар билан қўллаб-қувватланмайди. Рандомизация остида ўтказиладиган COVID-19 тадқиқотларида бошқа терапевтик ёки профилактика воситаларига кўпроқ эътибор қаратиш лозим», — дейди мутахассислар.
Мавзуга доир: Коронавирусга қарши витаминлар: касалликка чалинмаслик учун рационни қандай тузиш керак?
Швейцария ҳукумати ўтган суткада октябрь ойидан бери биринчи марта коронавирусдан бирорта ҳам ўлим қайд этмади.
Мамлакат Соғлиқни сақлаш вазирлигининг расмий маълумотларига кўра, ўтган 24 соат ичида Швейцарияда 717 кишида инфекция аниқланган. Умумий ҳисобда пандемия бошланганидан буён мамлакатда 696 213 киши касалликка чалинган.
Шу билан бирга, коронавирус 10 268 нафар швейсарияликнинг ҳаётига зомин бўлган, улардан 43 нафари сўнгги икки ҳафта ичида вафот этган. Таъкидланишича, сўнгги марта 2020 йилнинг 3 октябрь куни мамлакатда COVID-19’дан ўлим кузатилмаган.
Изоҳ (0)