Эрондаги нефтьни қайта ишлаш заводида ўн минг литрлаб бензин солинган бак ёниб кетди. Бу ҳақда Reuters хабар берди.
Теҳроннинг инқирозга қарши кураш бошқармаси раҳбари Мансур Даражатининг сўзларига кўра, Эрон пойтахтининг жанубий қисмидаги ушбу заводда суюлтирилган газ қувури ёрилиши сабабли ёнғин келиб чиққан.
Бироқ қайта ишлаш заводини бошқарадиган Tehran Oil Refining Co компанияси раҳбари Шейкер Ҳафайи бузғунчиликка уриниш бўлмагани, ёнғин чиқишига ишдаги эҳтиётсизлик сабаб бўлганини айтган. Шунингдек, унинг таъкидлашича, ёниб кетган бакда 20 минг баррельга яқин бензин бўлган.
Ёнғин натижасида яраланганлар ва ҳалок бўлганлар ҳақида маълумот берилмаган.
https://twitter.com/HeshmatAlavi/status/1400164943836729353
https://twitter.com/HeshmatAlavi/status/1400109910344421381
https://twitter.com/HeshmatAlavi/status/1400154165859557377
Теҳрондаги мазкур завод мамлакатдаги энг йирик нефтьни қайта ишлаш заводларидан биридир. У бензин, дизель ёнилғиси, мазут ва бошқа нефть маҳсулотларини чиқариб, Эронда ёнилғи ишлаб чиқаришнинг тахминан 15 фоизини таъминлаб беради.
Май ойи бошида Эроннинг Кум шаҳридаги кимёвий заводда ёнғин содир бўлган. Ёнғин атрофида фавқулодда ҳолат эълон қилиниб, барча ташкилотлар, шу жумладан, Ислом инқилоби посбонлари корпуси, ёнғинга қарши кураш учун сафарбар қилинган.
11 апрелда эса Эрондаги Аҳмад Рошан номли уранни бойитиш комплексида электр таъминотини тақсимлаш тизимида авария содир бўлган. Эрон Атом энергияси ташкилоти раҳбари Али Акбар Солиҳий тизимдаги носозлик «ядро террорчилиги» ҳаракати туфайли юзага келганини билдирган. Аммо у мазкур ҳаракатлар ортида қайси кучлар тургани борасида муайян фикр билдирмасликка қарор қилган.
Изоҳ (0)