Эрон ва Марказий Африка Республикаси (МАР) аъзолик бадалини тўламагани туфайли Бирлашган Миллатлар Ташкилоти (БМТ) Бош ассамблеясида овоз бериш ҳуқуқидан маҳрум бўлди. Бу ҳақда БМТ бош котиби Антониу Гутерриш маълум қилди, деб ёзади «РБК».
Хабарга кўра, овоз бериш ҳуқуқини тиклаш учун Эрон ташкилотга 16,2 миллион доллар, МАР эса 29,3 миллион доллар тўлаши керак.
Гутерриш таъкидлашича, ушбу давлатлардан ташқари яна учта мамлакат — Комор ороллари (871 минг доллар), Сан-Томе ва Принсипи (829 минг доллар) ҳамда Сомали (1,4 миллион доллар) БМТдан қарздор.
Агар қарзини тўламаса, сентябрдан кейин улар ҳам Бош ассамблеяда овоз бериш ҳуқуқларидан маҳрум бўлиши мумкин.
БМТ низомида таъкидланишича, қарздорлиги ўтган тўлиқ икки йил учун аъзолик бадали миқдорига тенг ёки ундан ошадиган аъзолар овоз бериш ҳуқуқидан маҳрум бўлади. Шу билан бирга, агар мамлакат унга боғлиқ бўлмаган сабабларга кўра қарздор деб топилса, Бош ассамблеяда ўз овозини сақлаб қолиши мумкин.
2020 йилнинг январь ойида аъзолик бадаллари тўланмагани сабабли БМТ етти мамлакат — Венесуэла, Ливан, МАР, Гамбия, Лесото, Яман ва Тонго давлатларини овоз бериш ҳуқуқидан маҳрум қилган эди.
2020 йилнинг февраль ойида Россия Ташқи ишлар вазирлиги БМТ бадалларини тўламайдиган асосий давлат АҚШ экани ҳақида хабар қилган. Ўша пайтда АҚШнинг қарзи 1 миллиард доллардан ошган. 2019 йил октябрь ойида эса Россия ТИВ АҚШ халқаро ташкилот ишини беқарорлаштириш учун ўз бадалини атайин тўламаётганини айтган.
Изоҳ (0)