Suriyada 26-may kuni bo‘lib o‘tadigan prezidentlik saylovida qatnashish uchun 51 nafar nomzod ariza topshirdi. Bu haqda SANA davlat agentligiga tayanib, “RIA-Novosti” xabar berdi.
Arizalar Oliy Konstitutsiyaviy sud tomonidan Suriya Xalq Kengashi — parlamentga topshirilgan.
“Xalq kengashi rahbari Oliy Konstitutsiyaviy suddan Xasan Rabiya Ruvaylining prezidentlikka nomzodi bo‘yicha arizasi qabul qilinganini e’lon qildi. Bu prezident saylovlarida ishtirok etish uchun qabul qilingan 51-ariza”, — deb yozadi agentlik.
2014-yilgi saylovlarda 24 ta ariza ro‘yxatdan o‘tkazilgan, ulardan uch nomzod, shu jumladan, amaldagi prezident Bashar Asad saylovlarda qatnashishga muvaffaq bo‘lgan edi.
Suriya konstitutsiyasiga muvofiq, parlament saylov kampaniyasi boshlangani to‘g‘risida e’lon qilinganidan keyin 10 kun ichida nomzodlarning arizalarini qabul qiladi. Bu yilgi saylov kampaniyasi 19-apreldan boshlandi. Nomzodlarning 12 nafari so‘nggi 24 soat ichida ariza topshirdi. Suriyada birinchi marta ayol kishi prezidentlik saylovida nomzod sifatida ro‘yxatdan o‘tdi. Shuningdek, Suriya prezidenti Bashar Asad ham yaqinlashayotgan prezidentlik saylovlariga o‘z nomzodini ro‘yxatdan o‘tkazish uchun so‘rov yubordi. Amaldagi konstitutsiyaga ko‘ra, Asad so‘nggi marta saylovlarda qatnashish huquqiga ega.
Ammo saylovlarda kamida 35 nafar deputatning ovozini to‘play oladigan nomzodlargina ishtirok eta oladi. Suriya Xalq Kengashi 250 deputatdan iborat ekani hisobga olinsa, nazariy jihatdan prezidentlik poygasida yetti kishidan ko‘p nomzod ishtirok eta olmaydi.
Shu bilan birga, bosh kotibi Bashar Asad bo‘lgan “Baas” Arab Sotsialistik uyg‘onish partiyasi nomzodi saylovlarda ishtirok etish uchun eng ko‘p imkoniyatga ega, chunki partiya parlamentda 167 o‘ringa ega.
Xalq Kengashidagi qolgan ovozlar mustaqil bo‘lib, ular 70 nafar deputat va “Milliy taraqqiyot fronti” koalitsiyasi tarkibiga kiruvchi partiyalar vakillaridan iborat, jami 13 nafar deputatga tegishli bo‘ladi.
Bashar Asad respublika rahbarligini 2000-yilda, otasi — Suriyaning sobiq prezidenti Hofiz Asad vafot etganidan keyin egallagan. Faqat 2014-yilda birinchi marta Asaddan boshqa nomzodlar ham prezidentlik saylovlarida qatnashgan. O‘shanda boshqalar qatorida Hasan an-Nuriy va Maxer Hajar prezidentlik uchun kurashgan. Ovoz berish natijalariga ko‘ra, Asad 88,7 foiz natija bilan uchinchi marta davlat rahbari etib saylangan.
Mavzuga doir:
