АҚШ ҳукумати 1958 йилда Хитойга ядровий зарба бериш имкониятини жиддий ўрганиб чиққан. Бу ҳақда мамлакат махсус хизматларининг яқинда ошкор қилинган махфий ҳужжатларидаги маълумотларга таяниб, Daily Mail хабар берди.
Ҳужжатлар Даниэль Эллсберг томонидан интернет тармоғига жойлаштирилган бўлиб, Эллсберг АҚШнинг Вьетнам урушидаги позицияси батафсил келтирилган 1971 йилги Пентагон ҳужжатларини ошкор қилган.
«Ҳеч қачон ва ҳеч қандай шароитда, шу жумладан, Тайванни ҳимоя қилишда бизнинг ядро қуролини режалаштириш, тайёрлаш ва таҳдид қилишга ҳақимиз йўқ», — деб ёзган Эллсберг Twitter’да.
Ўша пайтда Хитой ўз ҳудудлари яқинидаги Тайван армияси назорати назорат қилаётган оролларни самолётдан бомбардимон қилмоқчи эди. Таъкидланишича, Вашингтон агар Хитой оролларни эгаллаб олса, можарони ҳал қилишнинг усулларидан бири ХХР ҳаво базаларига ядровий зарба бериш бўлади, дея қарор қилган. Агар бу ҳам Хитой ҳукуматига таъсир қилмаса, АҚШ Шанхай ва мамлакатнинг бошқа шаҳарларига ядро зарбалари берилишини истисно қилмаган.
Шу билан бирга, ҳарбий раҳбарият Совет Иттифоқининг жавоб ядровий зарбаси хавфининг «деярли кафолатланганига» қарамай, ядровий қурол ишлатилиши керак, деб ҳисоблар эди.
Хабарда айтилишича, «Америка ҳарбий департаменти Совет Иттифоқи баҳсга аралашиши мумкинлигини, бу эса биринчи навбатда Окинава оролида жойлашган АҚШ қўшинларини йўқ қилишини тушуниб турган эди».
Бироқ ўша пайтдаги Хитой раҳбари Мао Цзэдун қирғоқдаги оролларни ўққа тутишни тўхтатиш тўғрисида буйруқ берганидан кейин минтақадаги кескинлик пасайган.
Аввалроқ Хитой ҳам АҚШни Тайван масаласида «олов билан ўйнамасликка» ҳамда Тайван бўғозидан Америка эсминецнинг ўтиши муносабати билан Тайван билан расмий алоқаларни ҳар қандай кенгайишини дарҳол тўхтатишга чақирган эди.
Изоҳ (0)