Suriya Oliy konstitutsion sudi 26-may kuni bo‘lib o‘tadigan prezidentlik saylovlarida ishtirok etish uchun uch nafar nomzodni ro‘yxatdan o‘tkazdi. Ulardan biri amaldagi davlat rahbari Bashar Asad bo‘ldi. Bu haqda “Kommersant” xabar berdi.

Foto: “Newinform.com”

Qolgan ikki o‘rinni sobiq davlat vaziri Abdalla Sallyum Abdalla (2003—2008-yillarda va 2012—2016-yillarda sotsialistlar patiyasidan Xalq kengashi deputati etib saylangan) va suriyalik Mahmud Ahmad Marey band qildi. Marey Suriya hukumati tomonidan ruxsat berilgan muxolifat harakatining vakili bo‘lib, tarafdorlarining Damashqqa qarshi qurolli kurash olib borayotgan surgundagi muxolifatchilarga hech qanday aloqasi yo‘q.

Saylovlarda ishtirok etish uchun 51 nafar nomzod ariza topshirdi. Ro‘yxatdan o‘tish uchun esa eng kamida 35 nafar deputatning ovoz berishi talab etiladi. Saylovda nomzod sifatida ro‘yxatga olinmaganlar uch kun ichida konstitutsion sudga apellyatsiya kiritishi mumkin.

Suriya muxolifatchilari rejalashtirilgan prezidentlik saylovlarini ko‘zbo‘yamachilik deb atadi. AQSh va Yevropa Ittifoqi oldindan saylov natijalarini tan olmasligini ma’lum qildi.

G‘arbiy OAV saylovlarda Asadning muammosiz to‘rtinchi muddatga qayta saylanishi haqida yozmoqda.

Suriyada navbatdagi prezidentlik saylovlari 26-may kuni bo‘lib o‘tishi rejalashtirilgan.