Suriyada bugun, 26-may kuni prezidentlik saylovlari bo‘lib o‘tmoqda. Saylov uchastkalarida ovoz berish soat 07:00 da boshlanib, soat 19:00 gacha davom etadi.
Mamlakatda va chet ellarda yashovchi 18 milliondan ortiq suriyalik fuqarolar prezidentlik saylovlarida ovoz berish huquqiga ega. Buning uchun 12 102 ta saylov uchastkalari tashkil etilgan.
“Saylov Damashq tomonidan nazorat qilinadigan hududlarda o‘tkazilmoqda. Avvalgi saylovlardan keyingi yetti yil ichida bu hudud kengayib ketdi. Shu bilan birga, Idlibda, shuningdek, Suriyaning shimoliy va shimoli-sharqidagi mintaqalarning bir qismida ovoz berishning iloji yo‘q”, — dedi Suriya Arab Respublikasi Xalq Kengashi a’zosi Usama Mustafo.
Damashqda ovoz berish jarayoni boshlanishi arafasida ommaviy tantanalar, konsertlar bo‘lib o‘tdi, poytaxt ko‘chalarida avtoulovlar milliy ramzlar bilan bezatildi.
Davlat rahbari lavozimi uchun kurashda uch nafar nomzod — amaldagi prezident Bashar al-Asad, sotsialistik ittifoqchi partiyaning sobiq deputati Abdulla Sallum Abdulla va vatanparvar muxolifat vakili Mahmud Ahmed Muray ishtirok etmoqda.
Damashq terrorchilar ovoz berish jarayonini buzish uchun qurolli hujumlar uyushtirishi mumkinligini istisno etmayapti. Shu sababli Suriya hukumati saylov uchastkalarining xavfsizligini ta’minlash uchun qo‘shimcha choralar ko‘rdi.
Suriyada avvalgi prezidentlik saylovlari 2014-yilda bo‘lib o‘tgan edi. Ovoz berishda Suriya fuqarolarining 73,5 foizi ishtirok etgan. Arab sotsialistik Uyg‘onish partiyasi rahbari Bashar al-Asad 88,7 foiz saylovchilarning qo‘llab-quvvatlashi bilan saylovda g‘alaba qozongan edi.
Suriya konstitutsiyasiga ko‘ra, davlat rahbari yana yetti yillik muddatga qayta saylanishi mumkin.
Izoh (0)