Жонс Ҳопкинс университети маълумотларига кўра, дунёда коронавирусни юқтириб олганлар сони 167 338 103 кишини ташкил қилмоқда. Вирус оқибатида вафот этганлар сони эса 3 474 370 тага тенг. Касалланиш ҳолатларининг кўплиги бўйича АҚШ (33,1 миллион), Ҳиндистон (26,9 миллион), Бразилия (16,1 миллион), Франция (5,6 миллион) ва Туркия (5,1 миллион) етакчилик қилмоқда.
Мальта COVID-19’га нисбатан жамоавий иммунитетга эришди
Мальтада вояга етган аҳолининг 70 фоизи COVID-19’га қарши камида битта доза билан эмланди, шу тариқа мамлакат Евроиттифоқда биринчи бўлиб жамоавий иммунитетга эришди. Бу ҳақда Мальта соғлиқни сақлаш вазири Крис Ферне айтиб ўтди. Вакцинанинг иккита дозасини ҳам олганлар улуши эса 40 фоизни ташкил этмоқда.«Мамлакатда ҳар беш сонияда бир киши эмланмоқда. Вояга етган аҳолининг 42 фоизи иккита дозани олди», — деди Ферне ва «вакцина — вирусга қарши қурол» дея қўшиб қўйди.
Унинг сўзларига кўра, тўлиқ эмланган кишилар июль ойидан бошлаб кўчада ниқоб тақиши шарт бўлмайди, аммо бино ичида ниқоб тақиш барча одамлар учун мажбурий бўлиб қолади.
Пандемия бошидан буён Мальтада 30,5 минг киши касалланиб, 417 киши вафот этган. Айни пайтда мамлакатда 16 ёшдан ошган фуқаролар 474,4 мингта вакцина олган.
Мавзуга доир: Исроил коронавирус устидан ғалаба қозонгани ҳақида эълон қилди. Яна қайси мамлакатлар бу маррага яқин қолмоқда?
Коронавирус оқибатида вафот этган тиббиёт ходимлари сони ҳисоблаб чиқилди
Пандемия бошидан буён дунёда камида 115 минг тиббиёт ходими коронавирус оқибатида ҳаётдан кўз юмди. Бу ҳақда Жаҳон соғлиқни сақлаш ташкилоти бош директори Тедрос Аданом Гебрейесус маълум қилди.«Қарийб 18 ой мобайнида бутун дунёдаги тиббиёт ходимлари ҳаёт ва ўлим чегарасида турди. Улар сон-саноқсиз ҳаётларни қутқариб, барча ҳаракатларга қарамай, ҳаётни тарк этганлар учун курашди. Уларнинг аксарияти ўзлари ҳам касалланди, ҳисобот тўлиқ бўлмаса-да, бизнинг ҳисоб-китобларимизга кўра, соғлиқни сақлаш соҳасининг камида 115 минг ходими бошқаларни қутқариш учун энг катта бадални тўлади», — деди Гебрейесус.
Шу билан бирга, пандемия бошидан буён кўплаб тиббиёт ходимлари «индивидуал ҳимоя воситалари ва вакциналардан фойдаланиш имкониятининг йўқлиги сабабли ўзларини ҳафсаласи пир бўлган, чорасиз ва ҳимоясиз» ҳис қилмоқда, дея қўшимча қилди ЖССТ раҳбари.
Хусусан, барча COVID-вакциналарнинг 75 фоиздан ортиғи бор-йўғи ўнта мамлакатга бориб етган.
«Агар тенг тақсимланганида эди, бутун дунёда киритилаётган дозалар миқдори бугунги кунда барча тиббиёт ходимлари ва кекса кишиларни қамраб олиш учун етарли бўлган бўларди», — дея қўшиб қўйди Гебрейесус.
ЖССТ раҳбари қайд этишича, пандемия тугагани йўқ ва агар коронавируснинг тарқалиши барча мамлакатларда назорат остига олинмаса, у давом этади. Гебрейесус, шунингдек, миллий ҳукуматларни сентябрга қадар аҳолининг камида 10 фоизини, 2021 йил охиригача эса 30 фоизини эмлашга чақирди.
Британияда итлар коронавирусни бир неча сонияда аниқлашга ўргатилди
Лондон гигиена ва тропик тиббиёт мактаби мутахассислари махсус тайёрланган итлар одам организмидаги коронавирусни бир неча сония ичида 94 фоиз аниқлик билан топади, деган хулосага келди.Medical Detection Dogs хайрия ташкилотига тегишли олтита ит иштирокида тадқиқот ўтказилган, уларда 3500 дан ортиқ ҳид намуналаридан фойдаланилди. Тадқиқотчилар коронавирус симптомлари бўлган одамларнинг кийимлари ва ниқобларини тўплади.
Чунончи, 200 та пайпоқдан намуналар олиниб, лаборатория синовлари учун олтита итга тақдим этилди. Итлар намунада коронавируснинг кимёвий бирикмаси бор-йўқлигини аниқлашга ўргатилди. Умуман олганда, итлар коронавирус намуналарининг 82-94 фоизини муваффақиятли аниқлай олди.
Итлар бир неча сония ичида ташхис қўйиб, тезлик бўйича ПЗР-тестни ортда қолдирди. Битта гуруҳда иккита бўлиб ишлаш орқали итлар ярим соатда 300 кишини текшириши мумкин — ўртача олганда бу битта авиарейс сиғимига тенг, шу сабабли ҳайвонлардан аэропортларда фойдаланиш режалаштирилмоқда.
Изоҳ (0)