Европа Кенгаши Ryanair самолётининг Беларусга мажбуран қўниши ҳамда мухолиф журналист Роман Протасевич ва унинг севгилиси София Сапеганинг ҳибсга олинишини қораламоқда. Бу ҳақда Европа Кенгаши саммити якунлари бўйича баёнотда айтилган.
Баёнотга кўра, Европа Кенгаши Европа Иттифоқи авиакомпанияларини Беларусь ҳудуди устидан ўтувчи парвозлардан воз кечишга чақирди, шунингдек, иттифоққа аъзо давлатлар ҳукуматларига Беларусь авиакомпанияларининг иттифоққа парвозларини тақиқлаш ҳамда Беларусь ҳукуматига қарши янги санкцияларни жорий этиш тўғрисида кўрсатма берди.
Бундан ташқари, Европа Кенгаши Протасевич ва Сапеганинг зудлик билан озод қилинишини ва Ryanair’нинг мажбурий равишда қўниши бўйича Фуқаро авиацияси халқаро ташкилоти томонидан тергов ўтказилишини талаб қилди.
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилди. Қўнишдан сўнг рейснинг икки йўловчиси — Роман Протасевич ва Софя Сапега ҳибсга олинди.
Беларусь расмийларининг маълум қилишича, Ryanair рейси бортида бомба борлиги ҳақида Минск аэропортига Фаластиннинг ҲАМАС ҳаракати номидан юборилган хабар келиб тушган. ҲАМАС ўзининг бу хабарга алоқаси йўқлигини айтди.
Ryanair самолётининг фавқулодда қўндирилишидан сўнг, Европа мамлакатлари Беларусдан парвозларни қабул қилишни рад эта бошлади, Европа авиакомпаниялари эса Беларусь ҳаво ҳудудини кесиб ўтишдан бош тортмоқда.
Беларусда Протасевичга қарши бир нечта жиноий ишлар, жумладан, оммавий тартибсизликларни ташкил қилиш бўйича иш қўзғатилган. 24 май куни Беларуснинг ҳукуматга яқин Telegram канали жойлаштирган видеода Протасевич айбига иқрор бўлганини айтган.
Изоҳ (0)