Lukashenko Ryanair samolyotining Minskka favqulodda qo‘nishi yuzasidan birinchi marta izoh berdi

Belarus prezidenti Aleksandr Lukashenko Ryanair samolyotining favqulodda Minskka qo‘nishi hamda Nexta Telegram kanalining sobiq bosh muharriri Roman Protasevich hibsga olinishi bilan bog‘liq hodisada qonun doirasida harakat qilgan. Bu haqda Lukashenkoning o‘zi parlament vakillari bilan uchrashuvda aytib o‘tdi, deb yozadi “RBK”.

“Samolyot BelAES yaqinida ortga qaytarilgan. Agar to‘satdan atom elektr stansiyasining xavfsizlik tizimlari to‘liq jangovar shay holatga keltirilganda nima bo‘lardi? Men barcha xalqaro qoidalarga muvofiq odamlarni himoya qilib, qonuniy harakat qildim”, — dedi prezident.

Uchrashuvda Lukashenko Ryanair samolyoti minalashtirilgani to‘g‘risida xabar Shveysariyadan kelganini aytdi.

Lukashenkoning so‘zlariga ko‘ra xabar kelib tushganidan so‘ng, ekipaj samolyot egalari va Vilnyusdagi aeroport bilan maslahatlashib, samolyotni Minskka qo‘ndirishga qaror qilgan.

Prezident, shuningdek, MiG-29 qiruvchi samolyoti Ryanair’ni qo‘nishga majbur qilgani haqidagi xabarlarni rad etdi va ularni “mutlaqo yolg‘on” deb atadi. Uning so‘zlariga ko‘ra, qiruvchining vazifasi aloqani ta’minlash va o‘ta og‘ir vaziyat yuzaga kelganda yo‘lovchi samolyotni qo‘nish uchun olib borish.

Bundan tashqari, Lukashenko Ryanair rahbari Maykl O’Lirining samolyot bortida Belarus davlat xavfsizlik qo‘mitasi (KGB) agentlari bo‘lishi mumkinligi haqidagi so‘zlariga izoh berdi. Lukashenkoning aytishicha, Vilnyusdan qaytib kelmaslik uchun Minskda uch kishi tushgan, ammo ulardan KGB agentlari “yasab olishgan”.

Umuman olganda, samolyotning favqulodda qo‘nishi haqidagi voqeani tavsiflar ekan, Lukashenko Belarus dushmanlari “tartibsizliklar uyushtirishdan bo‘g‘ib o‘ldirish bosqichiga o‘tgani”ni ta’kidladi.

Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qildi. Qo‘nishdan so‘ng reysning ikki yo‘lovchisi — Roman Protasevich va Sofiya Sapega hibsga olindi.

Belarus rasmiylarining ma’lum qilishicha, Ryanair reysi bortida bomba borligi haqida Minsk aeroportiga Falastinning HAMAS harakati nomidan yuborilgan xabar kelib tushgan. HAMAS o‘zining bu xabarga aloqasi yo‘qligini aytdi.

Ryanair samolyotining favqulodda qo‘ndirilishidan so‘ng, Yevropa mamlakatlari Belarusdan parvozlarni qabul qilishni rad eta boshladi, Yevropa aviakompaniyalari esa Belarus havo hududini kesib o‘tishdan bosh tortmoqda.