Xitoylik milliarder Jek Ma 2015-yilda asos solingan Hupan biznes maktabining prezidentligidan ketadi. Bu haqda Financial Times xabar berdi. Nashrning ma’lumotlariga ko‘ra, Ma maktabda ma’ruza o‘qishni davom ettiradi.
O‘tgan haftada OAVga berilgan ma’lumotlarga ko‘ra, Hupan University o‘z nomini Hupan Innovation Center’ga o‘zgartirdi. Manbalar bergan ma’lumotlarga ko‘ra, so‘nggi yillarda qaysi o‘quv yurtlari universitet maqomiga ega bo‘lishi mumkinligi ustidan qat’iy nazorat o‘rnatgan Xitoy hukumatining bosimi ostida biznes maktabi o‘z nomidan “universitet” so‘zini olib tashlashga majbur bo‘ldi.
Aprel oyida Financial Times’ning yozishicha, Jek Maning biznes maktabi o‘quv mashg‘ulotlari mart oyining oxirida boshlanishi belgilangan birinchi kurs talabalarini qabul qilishni to‘xtatishga majbur bo‘lgan va o‘quv jarayonlari boshlanmagan.
Hupan University bilan bo‘lgan voqea Xitoy hukumatining Jek Maga qilayotgan bosimining yana bir dalili hisoblanadi. 2020-yilda Alibaba’ning Ant Group bo‘limiga tegishli IPO’lar (initial public offering — aksiyalarning boshlang‘ich ommaviy taklifi) bekor qilindi, keyinroq Alibaba ustidan monopoliyaga qarshi tekshirish boshlandi va Xitoy hukumatining Alibaba’dan kompaniyaning media-aktivlarini ajratishni talab qilgani ma’lum bo‘ldi.
Xitoy hukumati va shaxsan davlat rahbari Si Szinpinning moliyaviy tartibga soluvchilarning “innovatsiyalarini bo‘g‘ib qo‘yishi”, shuningdek, Alibaba rahbarining butunlay mustaqil pozitsiyasi va kuchayib borayotgan ta’siri masalasidagi noroziliklari Jek Maning faoliyatida to‘siqlar hosil qilmoqda.
Ma’lumot uchun, Xitoyning Bozorni nazorat qilish va tartibga solish davlat bosh boshqarmasi Alibaba kompaniyasini monopoliyaga qarshi qonunni buzgani uchun 18,34 milliard yuan (2,78 milliard dollar) miqdorida jarimaga tortdi.
Shuningdek, Xitoy monopoliyaga qarshi kurash organlari hukumat bilan ziddiyatga borgan 56 yoshli milliarder Jek Maga tegishli Alibaba internet savdo tarmog‘iga rekord darajada jarima solishni rejalashtirayotgani ma’lum bo‘ldi.
Izoh (0)