Буюк Британияда коронавируснинг ғайриоддий генлар комбинациясига эга бўлган, уч карра мутацияга учраган штамми аниқланди, деб ёзмоқда Daily Mail.
Йоркшир вирусологларининг айтишича, коронавируснинг янги уч карра мутацияга эга штамми VUI-21MAY-01 ёки AV.1 деб номланган ғайриоддий генларнинг комбинацияси билан тавсифланади.
Бугунги кунда, асосан, Йоркшир ва Ҳамберда коронавируснинг янги штамми билан боғлиқ 49 та ҳолат рўйхатга олинди, лекин вируснинг бошқа турларидан тезроқ тарқалиши ёки вакциналарга қарши иммунитети йўқлиги ҳақида ҳеч қандай далил йўқ. Англия жамоат саломатлигини сақлаш хизмати ҳозирча «ўрганилаётган вариант» деб таърифланган янги мутациянинг тарқалишини текширмоқда.
Олимларнинг баҳолашича, вируснинг тарқалишини ўлчовчи R кўрсаткичи ҳозир 0,9 дан 1,1 гача миқдорни ташкил этмоқда, ўтган ҳафтада бу 0,8 ни ташкил қилган эди. Буюк Британия ҳукумати коронавируснинг ҳар қандай мутацияси кенг тарқалишининг олдини олишга ёрдам берувчи қатъий чоралар кўришга тайёр эканини маълум қилди.
Шеффилд жамоат хавфсизлигини сақлаш хизмати директори Грег Фелл ҳамкасблари билан VUI-21MAY-01’ни кузатганини айтди, шунингдек, штаммнинг тарқалиш даражаси юқорилиги ҳақида ҳеч қандай маълумот йўқлигини таъкидлади.
Эслатиб ўтамиз, пандемия даврида Буюк Британияда коронавируснинг бир нечта штаммлари аниқланди. B.1.1.7 номи билан маълум бўлган коронавируснинг «британча» штамми 2020 йилнинг охирида аниқланган эди. Бу штаммнинг ўлим хавфи даражаси олдингиларига қараганда 64 фоизга юқори экани аниқланди.
2021 йилнинг бошида Бристоль ва Ливерпулда ҳам коронавируснинг иккита янги штамми аниқланди, улардан бири «жиддий хавотирларга сабаб» бўлаётгани айтилди. Кейинроқ мамлакатда коронавируснинг яна бошқа штамми аниқланди.
13 апрелда Анголада коронавируснинг 34 та мутацияли янги штамми аниқлангани, февраль ойида эса Норвегияда коронавируснинг янги штамми тарқала бошлагани, Финляндияда коронавируснинг янги мутациясига дуч келингани ҳақида хабарлар берилган.
Изоҳ (0)