Buyuk Britaniyada koronavirusning uch karra mutatsiyaga uchragan shtammi qayd etildi

Buyuk Britaniyada koronavirusning g‘ayrioddiy genlar kombinatsiyasiga ega bo‘lgan, uch karra mutatsiyaga uchragan shtammi aniqlandi, deb yozmoqda Daily Mail.

Yorkshir virusologlarining aytishicha, koronavirusning yangi uch karra mutatsiyaga ega shtammi VUI-21MAY-01 yoki AV.1 deb nomlangan g‘ayrioddiy genlarning kombinatsiyasi bilan tavsiflanadi.

Bugungi kunda, asosan, Yorkshir va Hamberda koronavirusning yangi shtammi bilan bog‘liq 49 ta holat ro‘yxatga olindi, lekin virusning boshqa turlaridan tezroq tarqalishi yoki vaksinalarga qarshi immuniteti yo‘qligi haqida hech qanday dalil yo‘q. Angliya jamoat salomatligini saqlash xizmati hozircha “o‘rganilayotgan variant” deb ta’riflangan yangi mutatsiyaning tarqalishini tekshirmoqda.

Olimlarning baholashicha, virusning tarqalishini o‘lchovchi R ko‘rsatkichi hozir 0,9 dan 1,1 gacha miqdorni tashkil etmoqda, o‘tgan haftada bu 0,8 ni tashkil qilgan edi. Buyuk Britaniya hukumati koronavirusning har qanday mutatsiyasi keng tarqalishining oldini olishga yordam beruvchi qat’iy choralar ko‘rishga tayyor ekanini ma’lum qildi.

Sheffild jamoat xavfsizligini saqlash xizmati direktori Greg Fell hamkasblari bilan VUI-21MAY-01’ni kuzatganini aytdi, shuningdek, shtammning tarqalish darajasi yuqoriligi haqida hech qanday ma’lumot yo‘qligini ta’kidladi.

Eslatib o‘tamiz, pandemiya davrida Buyuk Britaniyada koronavirusning bir nechta shtammlari aniqlandi. B.1.1.7 nomi bilan ma’lum bo‘lgan koronavirusning “britancha” shtammi 2020-yilning oxirida aniqlangan edi. Bu shtammning o‘lim xavfi darajasi oldingilariga qaraganda 64 foizga yuqori ekani aniqlandi.

2021-yilning boshida Bristol va Liverpulda ham koronavirusning ikkita yangi shtammi aniqlandi, ulardan biri “jiddiy xavotirlarga sabab” bo‘layotgani aytildi. Keyinroq mamlakatda koronavirusning yana boshqa shtammi aniqlandi.

13-aprelda Angolada koronavirusning 34 ta mutatsiyali yangi shtammi aniqlangani, fevral oyida esa Norvegiyada koronavirusning yangi shtammi tarqala boshlagani, Finlyandiyada koronavirusning yangi mutatsiyasiga duch kelingani haqida xabarlar berilgan.