Хитойда кенг баҳсларга сабаб бўлган қонун қабул қилингач, ажрашишлар сони 70 фоизга камайди, деб ёзмоқда Tengrinews.
Хитой Фуқаролик масалалари вазирлигининг маълумотларига кўра, 2021 йилнинг биринчи чорагида тахминан 296 мингта ажралиш рўйхатга олинди. 2020 йилда бу кўрсаткич бир миллионтага етган эди.
Бунинг сабаби ҳукуматнинг 1 январдан жорий қилган мажбурий «ўйлаб кўриш» муддати билан изоҳланмоқда. Фуқаролик кодексига киритилган янги ўзгартиришларга мувофиқ, турмуш қурган жуфтлик ажрашишни расмийлаштиришдан олдин 30 кун кутиши керак.
Ҳукумат ушбу қонунни мамлакатда ажралишлар сони кўпайиб, туғилиш даражаси камайиши фонида қабул қилган эди. Агар ажрашиш учун ариза берган жуфтлик ваколатли органга 30 кундан 60 кунгача қайта мурожаат қилмаса, уларнинг мурожаати бекор қилинади. Ариза беришга оиладаги зўравонлик сабаб бўлса, «ўйлаб кўриш» муддати белгиланмайди.
Хитойликлар янги қонунни салбий қабул қилиб, айниқса, кўплаб аёллар ва ёшлар умуман турмуш қурмаслик билан таҳдид қилган. Хитой аҳолиси қонун лойиҳаси уларнинг оилавий ҳаётидаги эркинликни чеклайди, ажрашиш эса энди анча қимматга тушади, деб ҳисоблаган эди.
«Бахт учун никоҳ керак эмас, лекин ажрашиш керак. Бу маълумотларга кўра, 70 фоиз одам бахтга эришиш имкониятини йўқотган», — деб ёзди ижтимоий тармоқ фойдаланувчиларидан бири.
2003 йилдан буён Хитойда ажралишлар сони кескин кўпайди, бу эса демографик инқирозга олиб келди. Мутахассислар фикрига кўра, туғилиш даражасининг пасайгани сабабли аср охирига келиб Хитой аҳолиси икки баробарга камайиб кетиши мумкин. Бунга жавобан ҳукумат анъанавий қадриятларни тарғиб этиб, ажрашишларнинг олдини олишга ҳаракат қилмоқда.
Аввалроқ Хитой Давлат статистика бошқармаси мамлакат аҳолиси 2020 йилда 0,83 фоизга кўпайиб, 1 миллиард 411 миллион 780 минг кишини ташкил этганини, 2010 йилга таққослаганда аҳоли сони 72 миллионга ортганини маълум қилганди. Маълумотларга кўра, аҳолининг ўртача йиллик ўсиш суръати 0,53 фоизни ташкил этган. Бу кўрсаткич 2000—2010 йилларга нисбатан 0,04 фоизга камроқ ҳисобланади.
Шунингдек, дунёда эгизаклар туғилиши даражаси энг юқори чўққига чиққани ҳақида хабар берилди. Тадқиқот натижаларига кўра, дунё бўйича эгизакларнинг туғилиш миқдори ҳар 1000 та туғилишга нисбатан ўртача 9 тадан 12 тагача ошган, лекин бу кўрсаткич ҳар бир давлатда бир-биридан фарқ қилади. Энг катта ўсиш Шимолий Америкада (71 фоиз), Европада (60 фоиз), ва Осиёда (32 фоиз) кузатилган.
Изоҳ (0)