Шимолий Македония ҳукумати россиялик дипломатни мамлакатдан чиқариб юборишга қарор қилди. Бу ҳақда МКД ахборот порталига асосланиб, «РБК» хабар берди.
«Ташқи ишлар вазирлиги ушбу маълумотни тасдиқлади ҳамда Вена конвенциясининг дипломатик алоқалар тўғрисидаги 9-моддасига мувофиқ Россия Федерациясининг Шимолий Македония Республикасидаги элчихонаси дипломатини persona non grata деб эълон қилиш тўғрисида қарор қабул қилинди», — дея хабар беради портал.
Маълумот учун, 9-модда мамлакатга ҳар қандай дипломатик ходимни чиқариб юбориш ва сабабларини тушунтирмасдан, уни persona non grata деб эълон қилиш ҳуқуқини беради.
Хабарга кўра, 14 май куни Россия элчиси Сергей Баздникин Шимолий Македония ТИВга чақирилиб, россиялик дипломатлардан бири persona non grata деб эълон қилингани тўғрисида хабардор қилинган.
Қайд этилишича, элчини чақириш ва унга ноталарни тақдим этиш дипломатик протоколга мувофиқ бўлиб ўтган. МКД маълумотларига кўра, дипломат тез орада мамлакатни тарк этиши керак. Дипломатни чиқариб юбориш қарори сўнгги кунларда россиялик дипломатларни persona non grata деб эълон қилган айрим Европа мамлакатлари ҳаракатлари билан боғлиқ ёки йўқлиги номаълум бўлиб қолмоқда.
Россиянинг Шимолий Македониядаги элчихонаси дипломатнинг мамлакатдан чиқариб юборилишини тасдиқлади. «Биз нотани олдик, ҳақиқатан ҳам бир нафар дипломатни элчихонамиздан чиқариб юборишга қарор қилинди. Айни пайтда Россия жавоб чораларни кўриб чиқмоқда», — деди элчихона матбуот хизмати. Уларнинг қўшимча қилишича, дипломат етти кун ичида мамлакатни тарк этиши керак.
Изоҳ (0)