Сурхондарё вилоятининг Шеробод туманида содир бўлган йўл-транспорт ҳодисаси оқибатида 11 ёшли бола ҳалок бўлди. Бу ҳақда вилоят ИИБ ЙҲХБ ахборот хизмати хабар берди.
Маълум қилинишича, 16 май куни соат 16:20 ларда Шеробод тумани «Мажнунтол» маҳалласи ҳудудидан ўтувчи 4Р-103 автомобиль йўли орқали ҳаракатланиб келган «ВАЗ-2107» машинаси йўлни кесиб ўтаётган 11 ёшли болани уриб юборган.
Жабрланувчи олинган тан жароҳатлари оқибатида Шеробод тумани тиббиёт бирлашмасининг жонлантириш бўлимида вафот этган.
Аниқланишича, «Жигули» ҳайдовчисида автомобилни бошқариш ҳуқуқини берувчи ҳайдовчилик гувоҳномаси ва бошқа тегишли ҳужжатлар бўлмаган. Машина олди-сотдиси бўйича ҳеч қандай расмиятчилик ишлари амалга оширилмаган.
«Қурилиш ишлари бўлаётган эди. Ўша ердаги усталарга овқат олиб бориш учун машинани миниб чиққан эдим», — дейди ҳайдовчи.
Аввалроқ Тошкентда машина бошқариш ҳуқуқидан маҳрум қилинган Spark ҳайдовчиси пиёдани уриб юборгани тўғрисида хабар берилганди.
Изоҳ (0)