АҚШдаги Copart аукциони орқали ёниб кетган McLaren GT автомобили сотувга қўйилади. Автомобиль бутунлай ёниб, кул бўлган — суперкарнинг қайта сотишга арзийдиган бирор эҳтиёт қисми қолмаган. McLaren’ни ўзига хос газ чиқариш тизими ва сақланиб қолган ғилдирак дискалари орқали ажратиб олса бўлади, деб ёзади Motor.
Лот остидаги изоҳдан билиш мумкинки, углерод пластик ва металл уюми 2021 йилда ишлаб чиқарилган 212 минг долларлик McLaren суперкари ҳисобланади.
Британия купеси билан нима содир бўлгани номаълум, бироқ харидор машинанинг барча зарурий ҳужжатларини ҳам қўлга киритиши мумкин. Ёниб кетган суперкар ҳозирда Техасда сақланмоқда.
Сотувга қўйилган мазкур машинанинг идентификацион рақами Америка маълумотлар базасига киритилган, шу сабабли суперкарнинг ҳужжатларидан жиноий мақсадларда фойдаланиш имконсиз.
Аввалроқ буткул ёниб кетган Aston Martin, Singer Porsche ва BMW Z8 сотувга қўйилгани тўғрисида хабар берилганди.
Эслатиб ўтамиз, 2020 йилнинг апрелида Флорида штатининг Форт Майерс аэропорти яқинидаги каршеринг машиналар (қисқа вақтга ижарага бериладиган авто) жойлашган автопаркда чиққан ёнғин сабаб 3,5 мингта автомобиль ёниб кетганди. Декабрда эса Англияда содир бўлган ёнғин оқибатида ўнлаб миллион доллар турадиган 70 та ноёб автомобиль кулга айланганди.
Изоҳ (0)