10-may kuni Toshkent shahrining Yangihayot tumanida yo‘lni kesib o‘tayotgan fuqaro avtomashina urib yuborishi oqibatida vafot etdi. Bu haqda poytaxt IIBB axborot xizmati xabar berdi.
Foto: Toshkent shahar IIBB axborot xizmati
Ma’lum qilinishicha, hodisa soat 11:30 da tumanning Mehrigiyo ko‘chasida sodir bo‘lgan. Aniqlanishicha, Spark’ning 26 yoshli haydovchisi 3-fevral kuni Uchtepa tumani sudi tomonidan Ma’muriy javobgarlik to‘g‘risidagi kodeksining 131-moddasi 1-qismiga (transport vositalarini mast holda boshqarish) muvofiq transport vositasini boshqarish huquqidan 18 oyga mahrum qilingan.
Haydovchi avtomobilni boshqarib ketayotib, tartibga solinmagan piyodalar o‘tish joyidan kesib o‘tmoqchi bo‘lgan piyoda 23 yoshli B.R.ni urib yuborgan.
Oqibatda piyoda olgan jarohatlari sabab voqea joyida vafot etgan.
Holat yuzasidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarining buzilishi oqibatida odam o‘lishi) bo‘yicha jinoyat ishi qo‘zg‘atildi. Tergov harakatlari olib borilmoqda.
Avvalroq Farg‘onada Damas 9 yoshli qizni urib yuborgani, Navoiyda mast piyodani mashina urib ketishi oqibatida jabrlanuvchi vafot etgani, Samarqandda Cobalt maktab oldidagi piyodalar yo‘lagidan o‘tayotgan 8 yoshli qizni urib yuborgani to‘g‘risida xabar berilgandi.
