Фарғонада Nexia «КамАЗ»га урилиши оқибатида 2 киши вафот этди

Фарғона вилояти Учкўприк туманида Nexia ва «КамАЗ» иштирокида йўл-транспорт ҳодисаси содир бўлди, дея хабар бермоқда ЙҲХББ.

Маълум қилинишича, 2021 йилнинг 15 май куни тахминан соат 22:50 ларда Учкўприк тумани Бекобод қишлоғидаги чорраҳада ЙТҲ содир бўлди.

Қувасой шаҳрида яшовчи (1988 йилда туғилган) фуқаро ўз бошқарувидаги «КамАЗ» светофорнинг яшил чироғида чап тарафга бурилганда қарама-қарши томондан келаётган Боғдод тумани Конизар қишлоғида яшаган (1990 йилда туғилган) фуқаро бошқарувидаги Nexia автомобили билан тўқнашган.

ЙТҲ «КамАЗ» ҳайдовчиси рўпарадан келаётган Nexia ҳайдовчисига йўл бермагани сабаб содир бўлган.

Оқибатда Nexia автомобили ҳайдовчиси воқеа жойида, йўловчи эса шифохонада вафот этган.

Ҳозирда ҳолат юзасидан суриштирув ишлари олиб бориляпти.

Бундан аввал Наманганда Nexia дарахтга урилиши оқибатида бир йўловчи ҳалок бўлгани, Фарғонада Malibu велосипедчини уриб кетгани ҳамда Бухорода Matiz ҳайдовчиси пиёдалар йўлакчасидан ўтаётган мактаб ўқувчисига йўл бермай, унинг ўлимига сабабчи бўлгани ҳақида хабар берилганди.