Қозоғистонда Chevrolet савдолари 4697 фоизга ўсди. Асосий рақобатчи — Hyundai

Қозоғистонда Chevrolet бренди автомобилларининг савдоси 4697 фоизга ўсди. Бу ҳақда Қозоғистон автобизнес ассоциациясига таяниб, Spot хабар берди.

2021 йил бошидан бери мамлакатда 8923 дона Chevrolet моделлари сотилган, 2020 йилнинг мос даврида ушбу кўрсаткич 186 тани ташкил этган. Бу Chevrolet’га энг кўп сотилган брендлар рейтингига бошчилик қилиш имконини берган.

Қозоғистонликлар асосан Cobalt харид қилмоқда, бир неча ойдан буён ушбу модель биринчи ўринни эгаллаб келяпти. Мазкур модель савдоси ўсмоқда — март ойида 1001 донани ташкил этган бўлса, апрелга келиб 1355 тага етган. Иккинчи ўринни Nexia эгаллаган (апрель ойида 1000 дан ортиқ сотилган).

Мамлакатда савдолар бўйича Chevrolet’нинг асосий рақобатчиси Hyundai ҳисобланади. У брендлар орасида иккинчи ўринни эгаллаган, Accent эса энг кўп сотилган моделлар орасида 3-ўринда кетмоқда.

«Newauto.kz» сайтида (Қозоғистондаги автосалонлар агрегатори) Cobalt нархи жамланмасидан келиб чиқиб, 4,7 миллион тенгедан 5 миллион тенгегача экани кўрсатилган (113 миллиондан 120 миллион сўмгача).

Аввалроқ Ўзбекистонда 2021 йилнинг январь—март ойларида жами 44 454 дона енгил автомобиль ишлаб чиқарилгани, бу 2020 йилнинг мос даври (31 181 дона) билан таққослаганда 42 фоизга камлиги, Ўзбекистон экспорт қилаётган автомобилларнинг деярли барчаси Қозоғистон ҳисобига тўғри келаётгани тўғрисида хабар берилганди.

Эслатиб ўтамиз, 2020 йилнинг мартида UzAuto Motors Қозоғистонда Chevrolet ишлаб чиқаришни бошлаган. Дастлабки босқичда ишлаб чиқариш ҳажми йилига 26 000 транспорт воситасини ташкил қилади, келгусида уни 100 000 донага етказиш кўзда тутилган.