Ўзбекистонда 40,4 фоиз ҳолатда ажримлар моддий муаммолар туфайли келиб чиқмоқда — Тадқиқот

Ўзбекистонда оиладаги ажримларнинг 40,4 фоизи моддий муаммолар сабаб юзага келмоқда. Бу ҳақда «Ижтимоий фикр» республика жамоатчилик фикрини ўрганиш маркази томонидан ўтказилган социологик тадқиқотга таяниб, ЎзА хабар берди.

Телефон орқали ўтказилган сўровларда республиканинг барча ҳудудлари, шаҳар ва қишлоқ жойларида яшовчи, турли соҳа ва тармоқларда банд бўлган 18 ва ундан катта ёшдаги фуқаролар иштирок этган.

Сўров глобаллашув ва оммавий маданият оила институти барқарорлиги пасайишининг омили эканини аниқлаб берган (24,0 фоиз). Улар оммавий ахборот воситалари ва ижтимоий тармоқлар орқали ёшларнинг дунёқарашига, қадриятлари ва қарашларига таъсир кўрсатади, барқарор оила қуриш қобилиятини пасайтиради.

Сўров натижаларига кўра, 45 ёшдан катта респондентларнинг аксарияти ота-оналарнинг ёш оиланинг ҳаётига аралашуви унинг мустаҳкам бўлишига ёрдам беради, деган фикрга қўшилади. Бўй етган фарзандларнинг ота-оналари бўлган фуқаролар оиланинг ички ҳаётига аралашиши жоиз, бу ёш эр-хотинга хатоларга йўл қўймасликка ва фарзандлар никоҳининг мустаҳкам бўлишига ёрдам беради, деб ҳисоблайди. Ёшларнинг каттагина қисми қарама-қарши фикрда: 18—24 ёшдаги ҳар иккинчи респондентнинг фикрича (50 фоиз), ота-оналарнинг аралашуви салбий омил ҳисобланади, оиланинг мустаҳкамлигига путур етказади ва эр-хотин ўртасидаги можароларга олиб келади. 20,9 фоиз сўров иштирокчиларининг фикрига кўра, бундай аралашув – оилавий ажримларнинг кенг тарқалган сабаби ҳисобланади.

Сўров оиладаги ажримларнинг энг кенг тарқалган сабабларини аниқлаб берди: эр-хотин феъл-атворларининг мос келмаслиги (41,2 фоиз) ва оиладаги моддий муаммолар (40,4 фоиз).

Бепуштлик – 12,6 фоиз респондентларнинг фикрига кўра, никоҳ бузилишининг энг кенг тарқалган сабабларидан бири ҳисобланади. Фарзанд кўролмаслик – бу оила учун жиддий муаммо ва фарзанд кўришга интилаётган турмуш ўртоғи, эркак ва аёл, агар оилада узоқ вақт мобайнида фарзанд бўлмаса, ажрашиш учун ариза бериши мумкин.

Маълумот учун, Ўзбекистонда 2021 йилнинг январь—март ойларида 9213 та ажрим ҳолати қайд этилган.