Ўзбекистонликларнинг ҳар ўндан бири оилада аёлларга куч ишлатиш мумкин деб ҳисоблайди

«Ижтимоий фикр» республика жамоатчилик фикрини ўрганиш маркази Халқаро оила куни арафасида никоҳ ва оилавий муносабатларнинг энг долзарб масалалари, мавжуд оилавий муаммоларни аниқлаш ва уларнинг ечимини топишга қаратилган социологик тадқиқотлар ўтказди, деб хабар беради ЎзА.

Ўтказилган сўровларда республиканинг барча ҳудудлари, шаҳар ва қишлоқ жойларида яшовчи, турли соҳа ва тармоқларда банд бўлган 18 ва ундан катта ёшдаги фуқаролар иштирок этди.

Мазкур тадқиқот фуқароларнинг бўлажак турмуш ўртоғини танлаш ва оила қуриш мезонларига бўлган муносабатини аниқлаб беради. Сўров натижаларига кўра, ўзбекистонликлар молиявий мустақиллик, оила учун алоҳида доимий уй-жойнинг мавжудлиги ва бўлажак эр-хотиннинг жисмоний саломатлигини оила қуришнинг асосий шартлари, деб ҳисоблайди.

Сўров натижаларининг кўрсатишича, 41,2 фоиз иштирокчиларнинг оилаларида низо ва жанжаллар бўлиб туради. Фуқароларнинг фикрига кўра, қуйидагилар сўнгги йилларда оилавий можаролар юзага келишининг асосий сабаблари ҳисобланади:

• оила аъзолари ўртасидаги ўзаро тушунмовчилик;
• моддий қийинчиликлар; ўзининг оилавий мажбуриятларига масъулиятсиз муносабатда бўлиш;
• эр-хотиндан бирининг ўз ҳукмини ўтказишга, сўзсиз бўйсундиришга эришишга интилиши;
• бошқа оила аъзоларининг манфаатлари ва фикрини инобатга олмаслик;
• оила аъзоларининг бир-бирига бефарқлиги;
• эр-хотиндан бирининг спиртли ичимликларга ружу қўйиши;
• оиланинг бирон-бир аъзоси касаллиги ва шулар билан боғлиқ муаммолар.

Сўров иштирокчиларининг аксарияти эр томонидан хотинга нисбатан жисмоний куч ишлатилишига йўл қўйиб бўлмайди, деб ҳисоблайди. Бироқ ўзбекистонликларнинг жамоатчилик фикрида хавотирли тенденция ҳам кузатилади: 10,3 фоиз респондентлар айрим ҳолларда куч ишлатиш мумкин, деб ҳисоблаган. Респондентлар ушбу қисмининг фикрига кўра, аёл ўз хатти-ҳаракати билан эрини куч ишлатишга мажбур қилган ҳолларда жисмоний зўравонлик ҳолатига йўл қўйиш мумкин. Респондентларнинг фикрича, спиртли ичимликлар ва гиёҳванд моддаларни истеъмол қилиш (23,5 фоиз), ўзаро тушунмовчилик (22,1 фоиз) ва моддий қийинчиликлар (20,6 фоиз) аёлга нисбатан жисмоний зўравонлик намоён бўлишининг сабаблари ҳисобланади.Аввалроқ Наманганда хотинини кетмон билан калтаклаган эркакка жиноий иш қўзғатилгани, Хоразмда 19 ёшли келин ўзини осиб ўлдиргани, Навоийда рашк сабаб бир эркак ва аёл пичоқлангани тўғрисида хабар берилганди.