БМТ Бош Ассамблеяси 75-сессиясининг 18 май куни бўлиб ўтган ялпи мажлисида Орол денгизи минтақасини экологик инновациялар ва технологиялар зонаси деб эълон қилиш тўғрисида Ўзбекистон Президенти Шавкат Мирзиёев томонидан таклиф қилинган махсус резолюция бир овоздан қабул қилинди. Бу ҳақда Ташқи ишлар вазирлиги матбуот хизмати хабар берди.
Қарорни 60 га яқин давлат маъқуллади. Унда БМТ Бош Ассамблеяси Орол денгизи минтақасидаги экологик, ижтимоий, иқтисодий ва демографик вазиятни яхшилашга қаратилган минтақавий тадбирлар ва ташаббусларни қўллаб-қувватлаши таъкидланган.
Ҳужжатда атроф-муҳитни тиклаш, табиий ресурсларни тежаш ва минтақа аҳолисининг ҳаёт сифатини яхшилаш бўйича илмий-тадқиқот маслаҳат ишларини тарғиб қилиш ҳақида сўз боради.
Қарорда, шунингдек, Орол инқирози оқибатларини бартараф этиш ва минтақадаги экологик вазиятни барқарорлаштириш бўйича қўшма чора-тадбирларни амалга оширишда минтақавий ҳамкорликни кучайтириш муҳимлиги таъкидланган.
Бош Ассамблея барча манфаатдор томонларни қўшма фанлараро тадқиқотлар олиб боришга, экологик тоза технологияларни ишлаб чиқишга ва жорий этишга, барқарор инклюзив ва экологик барқарор иқтисодий ўсишга, энергия ҳамда сувни тежаш технологияларидан фойдаланишга чақирди.
Ҳужжатда, шунингдек, БМТнинг Ўзбекистон Президенти ҳузуридаги Орол денгизи халқаро инновацион марказини ва БМТ шафелигида Оролбўйи минтақаси учун Инсон хавфсизлиги бўйича кўп шериклик траст фонди ташкил этилишини қўллаб-қувватлаши акс эттирилган.
Оролбўйи минтақаси Бош Ассамблеяга экологик инновациялар ва технологиялар зонаси мақомини берган биринчи минтақа бўлди, дея таъкидлади ТИВ. Ҳужжат минтақавий ҳамкорлик, интеграция ва барқарор ривожланишнинг устувор йўналишларини қўллаб-қувватлашга қаратилган саъй-ҳаракатларни бирлаштиришга ҳамда ихтисослаштирилган идоралар дастурлари ва лойиҳалари, БМТ тизимининг маблағлари ва дастурларининг изчиллигини таъминлаши керак.
Эслатиб ўтамиз, Шавкат Мирзиёев 2020 йил сентябрь ойида Оролбўйи минтақасини экологик инновация ва технологиялар ҳудуди деб эълон қилиш ҳақида БМТ резолюциясини қабул қилишни таклиф этганди.
Бундан аввал АҚШдан Оролбўйи аҳолиси учун гуманитар ёрдам юборилгани, Жанубий Корея Оролбўйи минтақаси бўйича траст фондининг молиявий донорига айлангани ҳамда ҳукумат қарори билан Орол денгизи ва Оролбўйи ҳудудларида ўрмонзор барпо этиладиган майдон белгилангани ҳақида хабар берилганди.
Изоҳ (0)