BMT Bosh Assambleyasi Orol dengizi mintaqasi bo‘yicha maxsus rezolyutsiya qabul qildi
BMT Bosh Assambleyasi 75-sessiyasining 18-may kuni bo‘lib o‘tgan yalpi majlisida Orol dengizi mintaqasini ekologik innovatsiyalar va texnologiyalar zonasi deb e’lon qilish to‘g‘risida O‘zbekiston Prezidenti Shavkat Mirziyoyev tomonidan taklif qilingan maxsus rezolyutsiya bir ovozdan qabul qilindi. Bu haqda Tashqi ishlar vazirligi matbuot xizmati xabar berdi.
Qarorni 60 ga yaqin davlat ma’qulladi. Unda BMT Bosh Assambleyasi Orol dengizi mintaqasidagi ekologik, ijtimoiy, iqtisodiy va demografik vaziyatni yaxshilashga qaratilgan mintaqaviy tadbirlar va tashabbuslarni qo‘llab-quvvatlashi ta’kidlangan.
Hujjatda atrof-muhitni tiklash, tabiiy resurslarni tejash va mintaqa aholisining hayot sifatini yaxshilash bo‘yicha ilmiy-tadqiqot maslahat ishlarini targ‘ib qilish haqida so‘z boradi.
Qarorda, shuningdek, Orol inqirozi oqibatlarini bartaraf etish va mintaqadagi ekologik vaziyatni barqarorlashtirish bo‘yicha qo‘shma chora-tadbirlarni amalga oshirishda mintaqaviy hamkorlikni kuchaytirish muhimligi ta’kidlangan.
Bosh Assambleya barcha manfaatdor tomonlarni qo‘shma fanlararo tadqiqotlar olib borishga, ekologik toza texnologiyalarni ishlab chiqishga va joriy etishga, barqaror inklyuziv va ekologik barqaror iqtisodiy o‘sishga, energiya hamda suvni tejash texnologiyalaridan foydalanishga chaqirdi.
Hujjatda, shuningdek, BMTning O‘zbekiston Prezidenti huzuridagi Orol dengizi xalqaro innovatsion markazini va BMT shafeligida Orolbo‘yi mintaqasi uchun Inson xavfsizligi bo‘yicha ko‘p sheriklik trast fondi tashkil etilishini qo‘llab-quvvatlashi aks ettirilgan.
Orolbo‘yi mintaqasi Bosh Assambleyaga ekologik innovatsiyalar va texnologiyalar zonasi maqomini bergan birinchi mintaqa bo‘ldi, deya ta’kidladi TIV. Hujjat mintaqaviy hamkorlik, integratsiya va barqaror rivojlanishning ustuvor yo‘nalishlarini qo‘llab-quvvatlashga qaratilgan sa’y-harakatlarni birlashtirishga hamda ixtisoslashtirilgan idoralar dasturlari va loyihalari, BMT tizimining mablag‘lari va dasturlarining izchilligini ta’minlashi kerak.
Eslatib o‘tamiz, Shavkat Mirziyoyev 2020-yil sentabr oyida Orolbo‘yi mintaqasini ekologik innovatsiya va texnologiyalar hududi deb e’lon qilish haqida BMT rezolyutsiyasini qabul qilishni taklif etgandi.
Bundan avval AQShdan Orolbo‘yi aholisi uchun gumanitar yordam yuborilgani, Janubiy Koreya Orolbo‘yi mintaqasi bo‘yicha trast fondining moliyaviy donoriga aylangani hamda hukumat qarori bilan Orol dengizi va Orolbo‘yi hududlarida o‘rmonzor barpo etiladigan maydon belgilangani haqida xabar berilgandi.
