БМТ бош котиби Исроил ва Ғазо сектори ўртасидаги ўт очишларни зудлик билан тўхтатишни талаб қилди

Исроил ва Фаластин томонидан амалга оширилаётган жанговар ҳаракатлар зудлик билан тўхтатилиши керак, БМТ тезликда ўт очишни тўхтатишга эришиш учун барча томонлар билан бирга ишламоқда. Бу ҳақда ташкилот бош котиби Антониу Гутерриш БМТ Хавфсизлик кенгаши мажлисида маълум қилди, деб ёзади «РИА Новости».

«Жанг тўхтатилиши керак. У зудлик билан тўхташи керак. Бир томондан ракета ва миномёт зарбалари, иккинчи томондан ҳаво ва артиллерия ҳужумлари бас қилиниши керак. Мен барча томонларни бу даъватни инобатга олишга чақираман», — деди Гутерриш.

Унинг сўзларига кўра, «БМТ тезликда ўт очишнинг тўхтатилишига эришиш мақсадида барча томонлар билан фаол ҳамкорлик қилмоқда».

«Ғазодаги қочқинлар лагерига уюштирилган ва битта оиланинг 10 нафар аъзосининг ўлимига олиб келган ҳужумдан изтиробга тушдим. Гуманитар объектлар ҳимояланиши керак», — деди Гутерриш БМТ ХК йиғилишида.

«Журналистларнинг қўрқмасдан ва таъқиб қилинмасдан ишлашига рухсат берилиши керак. Ғазода ОАВ идораларининг йўқ қилиниши кучли хавотир уйғотади», — дея таъкидлади у.

«Олға силжишнинг ягона йўли — иккита давлат тузиш мақсадидаги музокараларга қайтиш, токи улар тинчлик, хавфсизлик ва ўзаро эътироф шароитида, икки давлатнинг умумий пойтахти Қуддус бўлган ҳолда, БМТнинг тегишли резолюциялари, халқаро ҳуқуқ ва бундан аввалги битимлар асосида ёнма-ён яшасин», — деди Гутерриш.

Бош котиб жанговар ҳаракатлар минтақада назорат қилиб бўлмайдиган инқирозни келтириб чиқариши мумкинлиги ҳақида огоҳлантирди. У сўнгги бир ҳафта ичида қарийб 200 кишининг ўлимига олиб келган зўравонликни «ўта мудҳиш» деб атади.

«Бу хавфсизлик соҳасида ҳам енгиб бўлмайдиган гуманитар инқирознинг юзага келишига олиб келиши мумкин, шунингдек, босиб олинган Фаластин ҳудудида ва Исроилда, балки бутун минтақада ҳам экстремизмнинг янада кучайишига имкон яратиши мумкин», — деди Гутерриш.

Фаластин—Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.

Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлади. Бунга жавобан Исроил Ғазо секторини ўққа тутди.

16 май ҳолатига, низо авж олганидан буён Ғазо секторидан Исроил ҳудудига қарата 2,9 мингта ракета отилган, шуларнинг 1150 таси тўхтатиб қолинган. Исроилда 10 киши ҳалок бўлиб, 50 га яқин одам жиддий жароҳатланган. Исроил ҳам Ғазо секторига юзлаб зарбалар берди. Исроилнинг авиазарбалари оқибатида 188 нафар фаластинлик ҳалок бўлди, улар орасида 55 нафар ёш бола бор.