Англиянинг «Лестер» клуби футболчилари Уэсли Фофана ва Ҳамза Чоудури Исроил билан тўқнашувда Фаластинни қўллаб-қувватлади.
Футболчилар жамоа Англия Кубоги финалида «Челси»дан устидан қозонилган ғалабани нишонлаётган вақтда Фаластин байроғини майдонга олиб чиққан.
Шунингдек, Шотландиянинг «Селтик» клуби мухлислари ҳам трибуналарга Фаластин байроғини илиб чиқди. Улар баннерларда Фаластин билан бирга эканини таъкидлади ва геноцидни тўхтатишга чақирди.
Аввалроқ Месут Ўзил ва «Фенербаҳче» (Туркия) клуби футболчилари 41-тур доирасида «Сивасспор»га қарши кечган ўйин олдидан Фаластинни қўллаб-қувватловчи футболкаларда майдонга чиққанди.
Эслатиб ўтамиз, Қуддуснинг ал-Ақсо масжидида Исроил полицияси ва фаластинликлар ўртасидаги тўқнашувлардан сўнг Ғазо секторини назорат қилувчи ҲАМАС гуруҳи Исроил ҳудудига ракета ҳужумларини бошлади. Бунга жавобан Исроил ҳарбий ҳаво кучлари Фаластин ҳудудларига авиазарбалар йўллади.
Фаластин Соғлиқни сақлаш вазирлиги хабарига кўра, 16 май куни Ғазода камида 42 киши, жумладан, 10 нафар бола ўлдирилган. Можаро бошланганидан бери эса 188 киши ҳалок бўлган, уларнинг 55 нафари болалар. Исроилда бир ҳафта ичида 10 киши, хусусан, икки бола ҳалок бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)