Angliyaning “Lester” klubi futbolchilari Uesli Fofana va Hamza Chouduri Isroil bilan to‘qnashuvda Falastinni qo‘llab-quvvatladi.
Futbolchilar jamoa Angliya Kubogi finalida “Chelsi”dan ustidan qozonilgan g‘alabani nishonlayotgan vaqtda Falastin bayrog‘ini maydonga olib chiqqan.
Shuningdek, Shotlandiyaning “Seltik” klubi muxlislari ham tribunalarga Falastin bayrog‘ini ilib chiqdi. Ular bannerlarda Falastin bilan birga ekanini ta’kidladi va genotsidni to‘xtatishga chaqirdi.
Avvalroq Mesut O‘zil va “Fenerbahche” (Turkiya) klubi futbolchilari 41-tur doirasida “Sivasspor”ga qarshi kechgan o‘yin oldidan Falastinni qo‘llab-quvvatlovchi futbolkalarda maydonga chiqqandi.
Eslatib o‘tamiz, Quddusning al-Aqso masjidida Isroil politsiyasi va falastinliklar o‘rtasidagi to‘qnashuvlardan so‘ng G‘azo sektorini nazorat qiluvchi HAMAS guruhi Isroil hududiga raketa hujumlarini boshladi. Bunga javoban Isroil harbiy havo kuchlari Falastin hududlariga aviazarbalar yo‘lladi.
Falastin Sog‘liqni saqlash vazirligi xabariga ko‘ra, 16-may kuni G‘azoda kamida 42 kishi, jumladan, 10 nafar bola o‘ldirilgan. Mojaro boshlanganidan beri esa 188 kishi halok bo‘lgan, ularning 55 nafari bolalar. Isroilda bir hafta ichida 10 kishi, xususan, ikki bola halok bo‘lgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)