Жиззах шаҳар ҳокимининг молия, иқтисодиёт ва камбағалликни қисқартириш бўйича биринчи ўринбосари — шаҳар иқтисодий тараққиёт ва камбағалликни қисқартириш бўлими бошлиғи вазифасини бажарувчи Ойбек Нурматов пора билан қўлга олинди. Бу ҳақда «Ёшлар» телеканалининг «Янги давр» информацион дастурида маълум қилинди.
Хабарда таъкидланишича, у аслида, Жиззах молиявий тизимининг шаффофлиги ва камбағалликни қисқартиришга масъул бўла туриб, тадбиркорга шаҳардаги ижтимоий соҳа объектларида амалга ошириладиган қурилиш-таъмирлаш ишлари бўйича ўтказиладиган тендер савдоларини олиб бериш эвазига ундан 2 минг доллар талаб қилган.
6 май куни соат 20:00 ларда Жиззах шаҳри «Жиззахлик» маҳалласи ҳудудида 2 минг доллар миқдоридаги пулни ўзининг Gentra автомобили юкхонасига ташлаб қўйган вақтида тезкор тадбир иштирокчилари томонидан ашёвий далиллар билан ушланган.
Шаҳар ҳокимлигининг «Gazeta.uz»га аниқлик киритишича, Ойбек Нурматов аслида Жиззах шаҳар молия бўлими бошлиғи лавозимида ишлайди. Кадрлар етишмаслиги сабабли унга ҳокимнинг биринчи ўринбосари вазифасини вақтинча бажариш юклатилган. Ҳокимнинг аввалги биринчи ўринбосари Зафар Эргашев лавозимини тарк этганига ҳали бир ой ҳам бўлмаган. Шу сабабли ҳокимлик сайтидаги раҳбариятда эски маълумот кўрсатилган.
Эслатиб ўтамиз, Жиззах вилояти ҳокимининг собиқ ўринбосари Акром Раҳмонқулов 2018 йилда лавозимга тайинлангач, уюшган жиноий гуруҳ тузиб, 494 миллиард сўмлик 82 та объектда қурилиш-таъмирлаш ишларини ўзининг раҳнамолигидаги 9 та пудрат ташкилотига топшириб, қурилиш ишлари ҳажмини сунъий равишда оширилган нархларда расмийлаштириш, қўшиб ёзиш орқали қарийб 20 миллиард сўмлик бюджет маблағларини талон-торож қилганди. Бош прокуратура бу ҳозиргача терговда аниқланган маълумотлар эканини айтганди.
Шавкат Мирзиёев 15 январь Акрам Раҳмонқуловни давлат сиёсатига хиёнат қилганликда айблаб, вилоят ҳокими ўринбосарининг бутун тўдасига қонуний жазо кўриш кераклигини таъкидлаганди.
Ҳозирда Раҳмонқулов ва унинг 10 нафар жиноий шериклари қамоққа олинган, тергов ҳаракатлари олиб борилмоқда.
Изоҳ (0)