«Менинг фикрим» жамоавий мурожаатлари порталида шаҳарларда транспорт воситаларининг максимал тезлигини чеклаш тўғрисида петиция эълон қилинди, деб хабар беради «Gazeta.uz».
Мурожаат муаллифи йўл ҳаракати қоидаларига ўзгартиришлар киритиш орқали шаҳарларда рухсат этилган максимал тезликни 50 километр/соат, ижтимоий аҳамиятга эга объектлар (мактаблар, болалар боғчалари, шифохоналар ва бошқалар) яқинида 30 километр/соатгача чеклашни таклиф этган.
Муаллифнинг Жаҳон соғлиқни сақлаш ташкилотга таяниб ёзишича, автомобиль соатига 30 километр тезликда ҳимоясиз (ҳимояланмаган) йўл иштирокчисига урилганда, кўп ҳолларда пиёдалар омон қолади, автомобиль тезлиги 50 километр/соатда эса уларнинг аксарияти вафот этиши мумкин.
ЖССТ пиёдалар ва транспорт воситаларининг тўқнашуви натижасида ўлимга олиб келадиган жароҳатларнинг олдини олиш эҳтимолини кўрсатадиган қуйидаги маълумотларни келтиради:
- 60 км/соатда юқори тезликда ўлим хавфи 95 фоизни ташкил қилади;
- 50 км/соат тезликда ўлим хавфи 80 фоизгача камаяди;
- 40 км/соат тезликда ўлим хавфи 38−40 фоиз бўлиши мумкин;
- 30 км/соат тезликда ўлим хавфи 10−13 фоизгача камаяди.
«Шуни унутмангки, шаҳарда пиёдаларга қараганда транспорт воситалари анча кам. Ҳамма пиёдалар ҳам ёш ва соғлом эмас. Бундан ташқари, транспорт воситасидан чиққанда ҳайдовчилар ҳам пиёдаларга айланишади ва уларнинг ҳаёти бошқалар каби таҳдидларга дучор бўлади», — дея таъкидлайди муаллиф.
Изоҳ (0)