Президент Шавкат Мирзиёев раислигида 12 май, чоршанба куни ўтказилган йиғилишда давлат раҳбари озиқ-овқат маҳсулотлари ишлаб чиқариш ҳажми ва нарх-навоси ҳақида сўз юритди, дея хабар бермоқда «Дарё» мухбири.
«Аҳолини озиқ-овқат билан таъминлаш кун сайин долзарб масалага айланиб бормоқда. Лекин айрим ҳудудларда баъзи турдаги озиқ-овқат маҳсулотлари ишлаб чиқариш ҳажмлари камайишига йўл қўйилмоқда.
Мисол учун, тухум ишлаб чиқариш ҳажми Тошкент вилоятида 5 фоизга, Сирдарёда 4 фоизга камайиши ҳисобига ушбу вилоятларда тухумнинг нархи 7 фоизга, республика бўйича эса 3,6 фоизга ошган.
Гўшт ва ўсимлик ёғининг ҳам жаҳон бозоридаги нархлари 1 йилдан буён тўхтовсиз ўсаётгани барча раҳбарларни зарур чора-тадбирларни кўришга ундаши керак», — деди давлат раҳбари.
Президент ёғ-мой маҳсулотларига ички бозорда аҳоли талабини қондириш мақсадида жорий йилда 246 минг тонна мойли экинларни етиштириш кераклигини таъкидлади.
«Ғаниев, Норқобилов вилоят ҳокимлари билан бирга жорий йилда чорвачилик йўналишида 1 мингта, паррандачиликдаги 277 та лойиҳани ишга тушириш ҳисобига 13 минг тонна гўшт, 608 минг тонна сут, 3 миллиард дона тухум ва 14 минг тонна парранда гўшти етиштирилишини таъминлаши лозим.
Ғаниев, Ж.Ходжаев, Хаитов вилоят ҳокимлари билан бирга 1,1 миллион гектар асосий майдонларда 224 минг гектар боғ-ток ораларига ҳамда ғалла ва эртаки экинлардан бўшайдиган 873 минг гектарга сабзавот, картошка, полиз, шоли, мойли ва озуқа экинларини етиштиришни ташкил этишлари зарур.
Ёғ-мой маҳсулотларига ички бозорда аҳоли талабини қондириш мақсадида жорий йилда 246 минг тонна мойли экинларни етиштириш ва бунинг ҳисобига 86 минг тонна мой ишлаб чиқарилишини таъминлаш керак», — деди Шавкат Мирзиёев.
Мавзуга доир:
- «Мактаблардаги аҳволни кўрса, одам тавба деб юборади» — Шавкат Мирзиёев мактабларда ҳалигача муаммолар кўплигини айтди
- Шавкат Мирзиёев «Ўзавтосаноат»да ишлаб чиқариш ҳажми 40 фоизга камайиб кетганини танқид қилди
- «Иқтисодий ўсиш камида 6 фоиз бўлиши учун масъуллар қўшимча захираларни топиши керак» — Шавкат Мирзиёев
Изоҳ (0)