Jizzax shahar hokimining moliya, iqtisodiyot va kambag‘allikni qisqartirish bo‘yicha birinchi o‘rinbosari — shahar iqtisodiy taraqqiyot va kambag‘allikni qisqartirish bo‘limi boshlig‘i vazifasini bajaruvchi Oybek Nurmatov pora bilan qo‘lga olindi. Bu haqda “Yoshlar” telekanalining “Yangi davr” informatsion dasturida ma’lum qilindi.
Xabarda ta’kidlanishicha, u aslida, Jizzax moliyaviy tizimining shaffofligi va kambag‘allikni qisqartirishga mas’ul bo‘la turib, tadbirkorga shahardagi ijtimoiy soha obyektlarida amalga oshiriladigan qurilish-ta’mirlash ishlari bo‘yicha o‘tkaziladigan tender savdolarini olib berish evaziga undan 2 ming dollar talab qilgan.
6-may kuni soat 20:00 larda Jizzax shahri “Jizzaxlik” mahallasi hududida 2 ming dollar miqdoridagi pulni o‘zining Gentra avtomobili yukxonasiga tashlab qo‘ygan vaqtida tezkor tadbir ishtirokchilari tomonidan ashyoviy dalillar bilan ushlangan.
Shahar hokimligining “Gazeta.uz”ga aniqlik kiritishicha, Oybek Nurmatov aslida Jizzax shahar moliya bo‘limi boshlig‘i lavozimida ishlaydi. Kadrlar yetishmasligi sababli unga hokimning birinchi o‘rinbosari vazifasini vaqtincha bajarish yuklatilgan. Hokimning avvalgi birinchi o‘rinbosari Zafar Ergashev lavozimini tark etganiga hali bir oy ham bo‘lmagan. Shu sababli hokimlik saytidagi rahbariyatda eski ma’lumot ko‘rsatilgan.
Eslatib o‘tamiz, Jizzax viloyati hokimining sobiq o‘rinbosari Akrom Rahmonqulov 2018-yilda lavozimga tayinlangach, uyushgan jinoiy guruh tuzib, 494 milliard so‘mlik 82 ta obyektda qurilish-ta’mirlash ishlarini o‘zining rahnamoligidagi 9 ta pudrat tashkilotiga topshirib, qurilish ishlari hajmini sun’iy ravishda oshirilgan narxlarda rasmiylashtirish, qo‘shib yozish orqali qariyb 20 milliard so‘mlik budjet mablag‘larini talon-toroj qilgandi. Bosh prokuratura bu hozirgacha tergovda aniqlangan ma’lumotlar ekanini aytgandi.
Shavkat Mirziyoyev 15-yanvar Akram Rahmonqulovni davlat siyosatiga xiyonat qilganlikda ayblab, viloyat hokimi o‘rinbosarining butun to‘dasiga qonuniy jazo ko‘rish kerakligini ta’kidlagandi.
Hozirda Rahmonqulov va uning 10 nafar jinoiy sheriklari qamoqqa olingan, tergov harakatlari olib borilmoqda.
Izoh (0)