Чехия ҳукумати Врбетицедаги ўқ-дорилар омборларида содир бўлган портлашларда айбланаётган Россиядан камида 1 миллиард крона (47 миллион доллар атрофида) миқдорида товон пули талаб қилмоқчи. Бу ҳақда республика молия вазири Алена Шиллерова Чехия телевидениесида маълум қилди, деб ёзади Meduza.
Хабарга кўра, гап ўқ-дорилар портлашидан кейин ҳудудни тозалаш учун бюджетдан сарфланган харажатларни қоплаш тўғрисида бормоқда.
«Халқаро ҳуқуққа мувофиқ энг ишончли йўл халқаро товондир. Чунки биз зарарни дейлик жиноий суд иши билан ундириш йўлини туцак, бу жуда узоқ вақт талаб этади» — деди Шиллерова.
Чехия телевидениеси хабарига кўра бир миллиард крона — бу фақат дастлабки миқдор, чунки зарар кўрган минтақанинг маъмурлари ўз даъволарини, шу жумладан, маънавий зарарни қоплаш ва мол-мулкдан фойдалана олмаслик кабилар учун компенсация миқдорини ошириши мумкин. Зарарланган ҳудудларга тарқалган ўқ дориларни тозалаш ишлари ҳали тугалланмаган.
Чехия ташқи ишлар вазири Якуб Кулганекнинг айтишича, расмийлар товон пули олиш учун яқин ҳафта ёки ойлар ичида мурожаат қилади. Аввалроқ у Чехия Врбетицедаги портлашлар натижасида юзага келган вайронагарчилик учун Россиядан узр ёки молиявий товон пули талаб қилиши мумкинлигини айтган эди, аммо товон пули миқдорига аниқлик киритмаган.
Чехия парламенти аъзоси Ондржей Бенешик Чехия учун Россиядан товон пули олиш қийин бўлишини, шу билан бирга, жараённи ҳеч бўлмаганда «бунга жим қараб бўлмаслигини» кўрсатиш учун бошлаш кераклигини айтган.
Аввалроқ Чехия бош вазири Андрей Бабиш Евроиттифоқ мамлакатлари раҳбариятини Врбетице қишлоғидаги портлашлар ҳақидаги иш бўйича Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирган эди.
Чехия Россияни 2014 йил 17 апрелда Моравиянинг жануби-ғарбий қисмидаги ўқ-дорилар омборида содир бўлган портлашларга алоқадорликда айблаганидан кейин улар ўртасидаги кенг кўламли сиёсий-дипломатик низо пайдо бўлди. Шундан сўнг Прага қиймати 6 миллиард евро бўлган «Дуковани» атом электр станциясининг янги энергия блокини қуриш бўйича тендерда иштирок этиш учун «Росатом» давлат корпорациясининг номзодлар сафидан чиқарилишини эълон қилди.
Бунинг ортидан Чехия 18 нафар россиялик дипломатни мамлакатдан чиқариб юборди. Бунга жавобан Москва ҳам 20 нафар чехиялик дипломатни мамлакатдан чиқариб юборди.
Изоҳ (0)