Шотландиядаги парламент сайловларида мустақиллик тарафдорлари кўпчилик овозни қўлга киритди. Улар Буюк Британиядан ажралиб чиқиш бўйича референдум ўтказишни режалаштирмоқда

Шотландияда 6 май куни бўлиб ўтган парламент сайловлари натижаларини сарҳисоб қилиш якунланди. Парламентдаги ўринларнинг аксариятини ҳукмрон Шотландия миллий партияси вакиллари ва уларнинг маслакдошлари бўлган «Яшиллар» эгаллаб туради.

Биргаликда улар 129 мандатдан 72 тасини қўлга киритди. Шундай бўлса-да, BBC News таъкидлашича, бу сиёсатшунослар кутганидан ёмонроқ натижа.

Ҳукуматни бошқарадиган Шотландия миллий партияси раҳбари Никола Стержен Британиядан мустақил бўлиш учун референдум ўтказилишини айтди —  бу етти йил ичида иккинчи референдум бўлади. Шу билан бирга, Стержен референдумга тайёргарлик жараёни коронавирус пандемияси тугамасдан бошланмаслигини айтди.

Шунга қарамай, ҳукумат раҳбари Шотландия аҳолиси ўз ҳуқуқларидан ҳамда референдумда овоз бериш имкониятидан фойдаланиши кераклигини таъкидлади. «Буни амалга ошириш учун судга мурожаат қилиш бемаънилик бўлади, аммо Шотландия расмийлари воқеаларнинг бундай тус олишига тайёр», — деди Стержен.

Шунингдек, 9 май куни Лондон мэри лавозими учун ўтказилган сайлов натижалари маълум бўлди. Овоз бериш натижаларига кўра, Содиқ Хон ушбу лавозимда қолди. Twitter’да у «барча лондонликларга мэр» бўлишда давом этишига ваъда берди. Хоннинг асосий рақиби консерваторлардан кўрсатилган номзод Шон Бэйли эди.

Содиқ Хон 2016 йилдан бери Лондон мэри лавозимида ишлаб келмоқда. Лондон мэри учун сайловлар 2020 йилда ўтказилиши керак эди, аммо пандемия сабабли кейинга қолдирилди ва шунга кўра, Хоннинг ваколат муддати бир йилга узайтирилди.

Шотландия 2014 йилда Буюк Британияни тарк этиш учун референдум ўтказган, ўшанда сайловчиларнинг аксарияти Британия таркибида қолиш учун овоз берган. 2016 йилда Буюк Британияда Европа Иттифоқидан чиқиш бўйича референдум бўлиб ўтди, унда мамлакат аҳолисининг аксарияти Brexit’ни қўллаб-қувватлади, Шотландия эса Европа Иттифоқида қолиш учун овоз берди. Ушбу референдумдан сўнг Шотландия ҳукумати мустақиллик тўғрисида янгидан овоз бериш зарурлигини эълон қилди.