Ўзбекистон ташқи ишлар вазири Абдулазиз Комилов Сиан шаҳрида бўлиб ўтадиган «Хитой—Марказий Осиё» иккинчи вазирлар учрашувида иштирок этиш учун 11—12 май кунлари Хитойга боради.
ТИВ матбуот хизматининг хабар беришича, мазкур тадбирда Хитой, Қирғизистон, Қозоғистон, Тожикистон ва Туркманистон ташқи сиёсат идоралари раҳбарлари ҳам қатнашади.
Вазирлар учрашуви чоғида ўзаро сиёсий ишончни мустаҳкамлаш, томонлар учун манфаатли ҳамкорликни янада илгари суриш, қўшма лойиҳаларни амалга ошириш, транспорт йўлаклари боғлиқлигига кўмаклашиш ва узлуксиз савдога кенг йўл очиш, минтақавий хавфсизликни таъминлаш ҳамда замонавий чақириқ ва таҳдидларга қарши курашиш борасидаги муносабатларни чуқурлаштиришга оид долзарб масалаларни муҳокама қилиш режалаштирилган.
Ташриф давомида Абдулазиз Комилов Хитой ТИВ раҳбари Ван И билан икки томонлама музокаралар ўтказади ва «Ипак йўли» 5-халқаро ЭКСПО очилиш маросимида нутқ сўзлайди.
Эслатиб ўтамиз, «Марказий Осиё—Хитой » биринчи вазирлар учрашуви 2020 йил 16 июль куни видеоконференция шаклида ўтказилганди.
Аввалроқ Абдулазиз Комилов АҚШ давлат котиби билан телефон орқали суҳбатлашиб, уни Тошкентга таклиф қилгани, Қирғизистон элчихонасига бориб, чегара тўқнашувларида вафот этганлар муносабати билан ҳамдардлик билдиргани ҳақида хабар берилган эди.
Изоҳ (0)