«Ўзгидромет» ҳафта давомида кузатиладиган об-ҳаво маълумотини эълон қилди

Ҳафтанинг биринчи ярмида Ўзбекистоннинг жануби-шарқий ҳудудлари нам ва беқарор ҳаво массалари таъсири остида бўлади, деб хабар бермоқда «Ўзгидромет».

10 май, душанба, кундуз куни республиканинг баъзи жойларида ёмғир ёғади, момақалдироқ бўлиши мумкин. Фарғона водийси вилоятларида ёмғир кечқурун ёғиши мумкин. Шимолий ҳудудларда ва республиканинг энг жанубида ёғингарчилик кутилмайди.

Кейинчалик иш ҳафтасининг охиригача республиканинг текислик ҳудудлари бўйича, асосан, қуруқ об-ҳаво бўлади.

Тоғолди ва тоғли туманларда ҳафта давомида баъзи жойларда момақалдироқ кузатилади, ёмғир ёғиши кутилмоқда.

Айрим кунларда республика бўйича баъзи жойларда шамол 15-20 метр/секундгача кучайиши кутилмоқда. Ҳаво ҳарорати кечаси 13-18 даража, кундузи 23-28 даража илиқ атрофида бўлади. Қайд этилишича, бундай ҳарорат май ойининг ўртаси учун ўртача кўп йиллик қийматларга яқин.