Президент матбуот котиби Ўзбекистонда хорижий тиллар «боғча – мактаб – олий таълим – корхона» занжири асосида ўрганилишини маълум қилди

Президент матбуот котиби Шерзод Асадов 10 май куни ўтказилган брифингда 6 май куни давлат раҳбари раислигида ўтказилган чет тилларини ўқитиш тизимини такомиллаштириш бўйича видеоселектор йиғилиши ҳақида сўз юритди, дея хабар бермоқда «Дарё» мухбири.

«Нима учун бу масала давлат раҳбари даражасида ўтказилди? Чунки ёшларнинг чет тилларини билиши ҳамма соҳалар ривожига асос бўлади. Мана, ҳозир ривожланган мамлакатлар билан ҳамкорликда заводлар, ташкилотлар, университетлар, клиникалар очиляпти, технологиялар кириб келяпти. Уларни ким ишлатади, технологияларни ким тушунади? Албатта, буларнинг ҳаммаси учун чет тилини билиш керак, буни ҳаётнинг ўзи талаб қиляпти.

Ривожланган давлатларга борсангиз, ҳамма ёшлар хорижий тилларни билади. Бу бўйича камчилигимиз бугун барча соҳаларда сезиляпти. Агар эндиям эътибор бермасак, дунёдан орқада қолиб кетамиз», — деди давлат раҳбари матбуот котиби.

Асадовнинг таъкидлашича, тил ўрганишни рағбатлантиришга, кадрлар малакасини оширишга бюджетдан катта маблағлар йўналтирилмоқда.

«Ҳурматли Президентимиз бу борада янги тизим яратиш, «боғча – мактаб – олий таълим – корхона» занжири асосида ҳамма жойда чет тиллари ўрганилишини ташкил этиш вазифасини қўйдилар. «Мактаб, лицей, коллеж ва олий ўқув юрти битирувчилари камида 2 та чет тилини мукаммал билишлари шарт», дедилар.

Шу мақсадда Вазирлар Маҳкамаси ҳузурида алоҳида агентлик тузиладиган бўлди. Тил ўрганишни рағбатлантиришга, кадрлар малакасини оширишга бюджетдан катта маблағлар йўналтирилмоқда. Йиғилишда чет тилларини оммалаштириш бўйича қарор ишлаб чиқишга топшириқ берилди. Бу соҳадаги кенг имкониятларни тез орада батафсил билиб оламиз», — деди Шерзод Асадов.