Дунёда очарчиликдан азият чекаётганлар сони беш йил ичидаги энг юқори кўрсаткичга етди

Озиқ-овқат маҳсулотлари ва фавқулодда ёрдамга муҳтож инсонлар сони беш йил ичида энг юқори даражага кўтарилди. Бу ҳақда озиқ-овқат инқирозини бартараф этиш соҳасида фаолият олиб борувчи БМТ, Европа Иттифоқи, давлат ва нодавлат ташкилотларнинг халқаро альянси ҳисобланган Озиқ-овқат инқирозига қарши курашиш глобал тармоғининг ҳисоботида маълум қилинди, деб ёзмоқда «Korrespondent.net».

Ҳужжатда ёзилишича, 2020 йилда низолар, иқтисодий қийинчиликлар, шунингдек, коронавирус пандемияси ва экстремал табиат ҳодисалари сабабли энг камида 155 миллион киши кескин очарчилик муаммосига дучор бўлди. Бу кўрсаткич 2019 йилга таққослаганда 20 миллионга кўпроқ. БМТнинг таъкидлашича, бундай ҳолат 2017 йил, биринчи ҳисобот эълон қилингандан буён кузатилаётган озиқ-овқат етишмовчилигининг барқарор ўсишига қаратилган хавотирли тенденцияга ишора беради.

Аҳолининг оммавий ўлимига ва бутун иқтисодий тизимнинг инқирозига йўл қўймаслик учун фавқулодда чоралар кўриш талаб этилган Буркина-Фасо, Жанубий Судан ва Яманда умумий ҳисобдан, тахминан, 133 минг киши озиқ-овқат хавфсизлиги «ҳалокатли даражада» таъминланмаган шароитга тушиб қолди.

Шунингдек, 2020 йилда энг камида 28 миллион киши озиқ-овқат хавфсизлиги таъминланмаган «фавқулодда ҳолат» шароитида очарчилик ёқасига келиб қолди. 38 та мамлакат ёки ҳудудларда кўрилган тезкор чоралар натижасида инсонларнинг ҳаёти ва уларнинг ҳаёт кечириш манбалари сақлаб қолинди.

Озиқ-овқат хавфсизлигининг етишмаслиги муаммоси ҳалигача Африка давлатларида энг юқори даражада бўлиб, тахминан, 98 миллион киши ёки 2020 йилда очарчилик муаммосига дуч келганларнинг учдан икки қисми шу қитъада истиқомат қилади. Лекин бу муаммо дунёнинг бошқа нуқталарида жойлашган давлатлар, шу жумладан, Яман, Афғонистон, Сурия ва Гаитига ҳам таъсир кўрсатди, бу давлатлар 2020 йилда энг оғир озиқ-овқат инқирози қайд этилган мамлакатлар ўнталигига киритилди.

Ҳисоботга кўра, очарчилик муаммосининг келиб чиқишига низолар, иқтисодий қийинчиликлар ва кўп ҳолларда коронавирус пандемияси каби омиллар сабаб бўлган. Улардан кейин асосий омиллар рўйхатининг учинчи ўрнида табиат ҳодисалари ва экстремал табиат ҳодисалари қайд этилган.

Маълумот учун, БМТ бош котиб Антониу Гутерриш шошилинч чоралар кўрилмаса, дунё бўйлаб миллионлаб одам очарчилик ёқасига бориб қолиши мумкинлиги ҳақида огоҳлантирди. Аввалроқ БМТнинг Атроф-муҳитни муҳофаза қилиш дастури (UNEP) тақдим этган янги ҳисоботда дунёдаги озиқ-овқат маҳсулотларининг учдан бир қисми чиқитга чиқиб кетиши маълум қилинган эди.

Шунингдек, ЮНЕСКО бош директори Одре Азуле 2030 йилгача дунё 40 фоиз миқдорда сув танқислиги муаммосига дуч келиши мумкинлигини айтди. Унинг сўзларига кўра, сув танқислиги билан боғлиқ вазият бошқа глобал муаммолар, шу жумладан, пандемия оқибатлари туфайли янада оғирлашади.