Dunyoda ocharchilikdan aziyat chekayotganlar soni besh yil ichidagi eng yuqori ko‘rsatkichga yetdi

Oziq-ovqat mahsulotlari va favqulodda yordamga muhtoj insonlar soni besh yil ichida eng yuqori darajaga ko‘tarildi. Bu haqda oziq-ovqat inqirozini bartaraf etish sohasida faoliyat olib boruvchi BMT, Yevropa Ittifoqi, davlat va nodavlat tashkilotlarning xalqaro alyansi hisoblangan Oziq-ovqat inqiroziga qarshi kurashish global tarmog‘ining hisobotida ma’lum qilindi, deb yozmoqda “Korrespondent.net”.

Hujjatda yozilishicha, 2020-yilda nizolar, iqtisodiy qiyinchiliklar, shuningdek, koronavirus pandemiyasi va ekstremal tabiat hodisalari sababli eng kamida 155 million kishi keskin ocharchilik muammosiga duchor bo‘ldi. Bu ko‘rsatkich 2019-yilga taqqoslaganda 20 millionga ko‘proq. BMTning ta’kidlashicha, bunday holat 2017-yil, birinchi hisobot e’lon qilingandan buyon kuzatilayotgan oziq-ovqat yetishmovchiligining barqaror o‘sishiga qaratilgan xavotirli tendensiyaga ishora beradi.

Aholining ommaviy o‘limiga va butun iqtisodiy tizimning inqiroziga yo‘l qo‘ymaslik uchun favqulodda choralar ko‘rish talab etilgan Burkina-Faso, Janubiy Sudan va Yamanda umumiy hisobdan, taxminan, 133 ming kishi oziq-ovqat xavfsizligi “halokatli darajada” ta’minlanmagan sharoitga tushib qoldi.

Shuningdek, 2020-yilda eng kamida 28 million kishi oziq-ovqat xavfsizligi ta’minlanmagan “favqulodda holat” sharoitida ocharchilik yoqasiga kelib qoldi. 38 ta mamlakat yoki hududlarda ko‘rilgan tezkor choralar natijasida insonlarning hayoti va ularning hayot kechirish manbalari saqlab qolindi.

Oziq-ovqat xavfsizligining yetishmasligi muammosi haligacha Afrika davlatlarida eng yuqori darajada bo‘lib, taxminan, 98 million kishi yoki 2020-yilda ocharchilik muammosiga duch kelganlarning uchdan ikki qismi shu qit’ada istiqomat qiladi. Lekin bu muammo dunyoning boshqa nuqtalarida joylashgan davlatlar, shu jumladan, Yaman, Afg‘oniston, Suriya va Gaitiga ham ta’sir ko‘rsatdi, bu davlatlar 2020-yilda eng og‘ir oziq-ovqat inqirozi qayd etilgan mamlakatlar o‘ntaligiga kiritildi.

Hisobotga ko‘ra, ocharchilik muammosining kelib chiqishiga nizolar, iqtisodiy qiyinchiliklar va ko‘p hollarda koronavirus pandemiyasi kabi omillar sabab bo‘lgan. Ulardan keyin asosiy omillar ro‘yxatining uchinchi o‘rnida tabiat hodisalari va ekstremal tabiat hodisalari qayd etilgan.

Ma’lumot uchun, BMT bosh kotib Antoniu Guterrish shoshilinch choralar ko‘rilmasa, dunyo bo‘ylab millionlab odam ocharchilik yoqasiga borib qolishi mumkinligi haqida ogohlantirdi. Avvalroq BMTning Atrof-muhitni muhofaza qilish dasturi (UNEP) taqdim etgan yangi hisobotda dunyodagi oziq-ovqat mahsulotlarining uchdan bir qismi chiqitga chiqib ketishi ma’lum qilingan edi.

Shuningdek, YuNESKO bosh direktori Odre Azule 2030-yilgacha dunyo 40 foiz miqdorda suv tanqisligi muammosiga duch kelishi mumkinligini aytdi. Uning so‘zlariga ko‘ra, suv tanqisligi bilan bog‘liq vaziyat boshqa global muammolar, shu jumladan, pandemiya oqibatlari tufayli yanada og‘irlashadi.