АҚШ Эстонияда ҳарбий машғулотлар ўтказишни бошлади

Эстонияда АҚШнинг Swift Response машғулотларининг фаол босқичи бошланди, деб ёзмоқда ERR.

5 май куни кечқурун АҚШнинг 41-артиллерия бригадаси Эстония мудофаа кучларининг марказий полигонидаги бир нечта ракета тизимларидан жанговар ўқ отиш машқларини ўтказиши, бешта учириш қурилмасидан ўндан ортиқ ракета учириши керак эди.

Ўқ отиш пайтида ўт очишни бошқариш ва нишонга олиш машқлари, шунингдек, турли хил бўлинмалар ва штаблар ўртасидаги мувофиқлаштириш ишлари бажарилмоқда.

7 май куни кечқурун АҚШнинг 82-ҳаво десант қўшинлари Нурмси (Эстониянинг шимолий-марказий қисмида жойлашган Пайде шаҳридаги қишлоқ) аэродромига қўнади. 8 май куни АҚШ ҳарбийлари аэродромдан мудофаа кучларининг марказий полигонига десант қўшинларини вертолётдан ташлаш машқаларини бажаради.

Swift Response АҚШ раҳбарлигидаги Defender Europe 2021 машғулотларининг бир қисми бўлиб, АҚШнинг 25 йил ичида Европадаги энг йирик машғулотлари ҳисобланади. Swift Response’да Эстония, АҚШ ва Буюк Британиянинг, тахминан, 2,5 минг нафар ҳарбий хизматчиси, 20 дан ортиқ самолёти ва 25 та вертолёти иштирок этади. Манёврлар 14 майда якунланади.

Defender Europe машғулотлари Европанинг 16 та давлатида олиб борилади ва унда 28 минг нафар ҳарбий хизматчи иштирок этади.

Аввалроқ АҚШ Ҳаво кучларининг глобал зарба қўмондонлиги Minuteman III қитъалараро баллистик ракетанинг синови муваффақиятсиз ўтганини маълум қилди. Хабарга кўра, машғулотлар доирасида жанговар каллаксиз ракетани Калифорниядаги Ванденберг базасидан учириш режалаштирилган эди. Ишга туширгич билан боғлиқ муаммолар туфайли синовлар муваффақиятсиз тугаган.

Бундан олдин АҚШ ҳарбий ҳаво кучларининг AGM-183A ARRW гипертовушли ракетаси синовлари муваффақиятсиз тугагани маълум қилинганди. Ракета Boeing B-52 Stratofortress бомбардимончи самолётидан учирилиши керак эди.

Маълумот учун, Россия Қуролли Кучларининг Қримдаги ҳарбий машғулотларида 10 мингдан ортиқ аскар, 1200 та қурол ва ҳарбий техника, шунингдек, 40 дан ортиқ ҳарбий кема иштирок этди. Таъкидланишича, машғулотлар Қора денгиз флоти ва Россия денгиз флотининг Каспий флотилияси таркибига киритилган.