AQSh Estoniyada harbiy mashg‘ulotlar o‘tkazishni boshladi

Estoniyada AQShning Swift Response mashg‘ulotlarining faol bosqichi boshlandi, deb yozmoqda ERR.

5-may kuni kechqurun AQShning 41-artilleriya brigadasi Estoniya mudofaa kuchlarining markaziy poligonidagi bir nechta raketa tizimlaridan jangovar o‘q otish mashqlarini o‘tkazishi, beshta uchirish qurilmasidan o‘ndan ortiq raketa uchirishi kerak edi.

O‘q otish paytida o‘t ochishni boshqarish va nishonga olish mashqlari, shuningdek, turli xil bo‘linmalar va shtablar o‘rtasidagi muvofiqlashtirish ishlari bajarilmoqda.

7-may kuni kechqurun AQShning 82-havo desant qo‘shinlari Nurmsi (Estoniyaning shimoliy-markaziy qismida joylashgan Payde shahridagi qishloq) aerodromiga qo‘nadi. 8-may kuni AQSh harbiylari aerodromdan mudofaa kuchlarining markaziy poligoniga desant qo‘shinlarini vertolyotdan tashlash mashqalarini bajaradi.

Swift Response AQSh rahbarligidagi Defender Europe 2021 mashg‘ulotlarining bir qismi bo‘lib, AQShning 25 yil ichida Yevropadagi eng yirik mashg‘ulotlari hisoblanadi. Swift Response’da Estoniya, AQSh va Buyuk Britaniyaning, taxminan, 2,5 ming nafar harbiy xizmatchisi, 20 dan ortiq samolyoti va 25 ta vertolyoti ishtirok etadi. Manyovrlar 14-mayda yakunlanadi.

Defender Europe mashg‘ulotlari Yevropaning 16 ta davlatida olib boriladi va unda 28 ming nafar harbiy xizmatchi ishtirok etadi.

Avvalroq AQSh Havo kuchlarining global zarba qo‘mondonligi Minuteman III qit’alararo ballistik raketaning sinovi muvaffaqiyatsiz o‘tganini ma’lum qildi. Xabarga ko‘ra, mashg‘ulotlar doirasida jangovar kallaksiz raketani Kaliforniyadagi Vandenberg bazasidan uchirish rejalashtirilgan edi. Ishga tushirgich bilan bog‘liq muammolar tufayli sinovlar muvaffaqiyatsiz tugagan.

Bundan oldin AQSh harbiy havo kuchlarining AGM-183A ARRW gipertovushli raketasi sinovlari muvaffaqiyatsiz tugagani ma’lum qilingandi. Raketa Boeing B-52 Stratofortress bombardimonchi samolyotidan uchirilishi kerak edi.

Ma’lumot uchun, Rossiya Qurolli Kuchlarining Qrimdagi harbiy mashg‘ulotlarida 10 mingdan ortiq askar, 1200 ta qurol va harbiy texnika, shuningdek, 40 dan ortiq harbiy kema ishtirok etdi. Ta’kidlanishicha, mashg‘ulotlar Qora dengiz floti va Rossiya dengiz flotining Kaspiy flotiliyasi tarkibiga kiritilgan.